Sugilanon Ni Tita Linda

Ni Tita Linda Belayro

Botelya

Si Andoy hay isaeang ka mangingisda. Parabil imaw maghalin ko agahon ngaron, duro guid ro bilin kana ko anang kapritsioso nga asawa.

Pag abot ni Andoy sa tonga it dagat, guin haboy nana ro anang eambat. Pilang beses nana nga guin haboy ro anang eambat ogaling owa guid it maskin sambilog nga ibis ro hadakpan. 

Sa katapusan nga haboy, may hadakpan imaw nga maisot nga botelya. Guin himos nana ro anang eambat ag guin butang ro botelya sa anang aeat.

Pag abot sa baeay, nag hueat ro anang asawa sa pagpati nga abo ro dakop ni Andoy. Duro guid ro anang kaakig ay owa it dakop, owa man it soea. Ro anang hakitang botelya, guin haboy na sa kaakig. Tumama  ro botelya sa bato ag napusa. May nag guwa nga aso sa botelya ag nagporma nga tawo nga mabahoe, genie gali. Nag eohod ro genie sa atobadngan ko babaye ag naghambae kon ano ro isugo kana. Nangayo imaw it mabahoe ag kumpleto nga baeay. May nagtindog nga baeay nga kumpleto sa kagamitan. Dayon, nangayo it saeakyan, mga alahas ag pagkaon ro asawa ni Andoy. Tanan ro guin pangayo guin tao sa babaye. 

Sa kabuhayon nga pagpinangayo it babaye, amat-amat nga nag eoya ro genie. May limite man gali ro kinaadman it genie. Sa kaeo-oy ni Andoy, guin pangutana ro genie kon ano ro ikabulig ni Andoy. Naghinyo ro genie nga ibutang sa anang kilid ro botelya. Guin pabo-oe it sambilog nga buhok sa anang oeo agod sug-an. Ro aso ko buhok nagsimpon sa genie ag nangin aso man dayon ro genie nga nagsueod sa botelya. Guin takpan ni Andoy ro botelya ag guin haboy sa dagat.

Samtang naubos ro tanan nga manggad nanday Andoy tongod sa owa it habas nga pag inabuso ko anang asawa. Guin usoy nana ro botelya agod mangayo eon man it uman sa genie ogaling owa eon ro botelya. Owa man ro genie. Nagbalik sanday Andoy sa dating pagka pobre. 

Ogaling may guin aywan ro genie kana ag sa tama nga tiyempo paga gamiton eamang nana kon kinahangean guid. Halin kato, nag eain do batasan ko babaye. Nagabulig imaw kay Andoy ag guin tatap man nana ro andang mga unga. Owa it maka tupong sa kalipay ni Andoy. /MP