Sugilanon Ni Tita Linda

Ni Tita Linda Belayro

Libro Ni Athena

Guina kilaea ko mga Griyego si Athena nga diyosa it kaaeam. Minerva ro tawag kana ko mga Romano nga diyosa man it kaaeam. 

 
Iya sa eogta, guina sunlog si Cedrico nga bubolink o bubo tongod permeng zero ro anang resulta sa eksamin. Tongod kara, naakig ro anang ama bangod puro may “honors” ro anang mga magueang (igmanghod). Agod maka tagam sa kaakig ko anang ama, nag adto si Cedrico sa paboritong lugar, idto sa idaeom it punong mangga, daea ro anang “school bag”. Sa sobrang kaga-oy it pag paino-ino, nakatoeogan imaw. 

 
Nagdamgo imaw sa anang pagkatoeog. Sa anang damgo, may nagpakita kana nga Ada ag nagpakilaea nga si Athena, ro diyosa it kaaeam. Bu-ot nana nga buligan si Cedrico. Guin sugo nana nga parabil imaw magkatoeog, buksan ro toeon-an ag obrahon nga mahaea. Guin eksplikahan imaw nga sa anang pagbugtaw, tanan ro kutob nga nabuksan nga pahina nga guin oeonan hay maga sueod sa anang oeo. 

 
Pagbugtaw ni Cedrico, may eagi nga libro imaw nga nakita. Guin buksan nana ro toeon-an, ag idto hakita ro anang mga leksyon ko nagtaliwan nga mga inadlaw. Anang guin toman ro sugo it Ada. Pagka gabi-e, guin buksan nana kon siin ro anang leksyon ag guin obra nana nga mahaea. Pag abot it eksamin, tanan ro anang marka hay mataas. Pag abot it pagtakop it klase, isaea imaw sa “top ten”.

 
Hakibot ro anang mga kaklase. Owa eon imaw na zero. Bu-ot ko anang mga kaklase nga diskobrehon ro anang sekreto. Andang guin takaw ro anang bag. May hakita sanda nga libro ogaling owa man it nakasueat. Andang guin pilak ratong libro. Guin pueot ni Cedrico ag mag uli. 

 
Padayon ro pag aeam ni Cedrico. Tongod sa kahikaw ko anang mga ka klase, guin butang-butangan imaw nga may hakita nga guina panag iyahan it bruha. Guin akusahan pa nga naga panloko imaw, busa guin preso si Cedrico. Sa presuhan, nagbisita kana si Athena ag sa bisa ko gahum it diyosa, naka guwa imaw. Guin daea si Cedrico sa bukid it Olympus, sa baeay it mga diyos ag diyosa. 

 
Abo nga mga diyosa ro nahikaw kay Athena tongod bata ag gwapo si Cedrico. Umabot ro onga nga si Lira ag naila man kay Cedrico ogaling guin bawaean imaw ay bata pa. Guin uli si Cedrico sa eogta. Nagkabuhi imaw it normal. Nakaasawa ko olihi it manggaranon nga babaye tongod kilaea eon imaw sa anang kaaeam. Nagka onga sanda it babaye ag guin hingaeanan kay Athena bilang pagdumdom sa bulig ko diyosa nga nagtao ag nagbulig kana nga mangin maaeam. /MP