Sugilanon Ni Tita Linda Belayro

Kamandag It Kobra

Ro mag-asawang Berto ag Saning hay naga estar sa maisot nga baeay sa tunga it kagueangan. Ro eogta nga andang guina estahan hay guin tao kanda it gobiyerno pagkatapos nga andang guinlimpyuhan. Abo ag maeangbo ro andang pananum. May mga hayupan man sanda. Kada Domingo, naga adto sanda sa banwa agod daehon ro andang tubas agod ibaligya. Ro kabakeanan hay anda dayon nga gina bakae it igdaeapat ag pagkaon sa sueod it sang domingo.

Isaeang adlaw, samtang naga pangtapas it taeahib si Berto ag Saning, may tumuklaw sa bati-is ni Saning. Isaeang ka mabahoe nga kobra rong hakita ni Berto. Dali-dali nana nga tinigpas rong ueo it kobra. Dayon guin suyop man nana rong kamandag it sawa sa batiis ni Saning. Sa kaeu-oy it Diyos, owa man it maea-ing hatabo kay Saning. 

Tumaliwan ro mga binuean. Nagnabdos si Saning. Makataliwan rong siyam nga buean, nag unga si Saning it isaeang ka matimsog nga eaeaki. Guin pangaeanan imaw kay Onyok. Nagbahoe si Onyok sa tunga it kagueangan nga may ka-ila maghayupan it sawa. 

Ko isaeang adlaw, may isaeang ka babaye nga hasubeang si Onyok. Naga-usoy it bueong sa naangkit it sawa nga anang onga nga babaye.

Guin daea imaw sa mga alila nga sawa ni Onyok. Guin turo ko babaye nga isaeang ka kobra ro nakaangkit kana. Dayon nagmunot si Onyok sa baeay it babaye. Daea ni Onyok ro anang alilang kobra. Guinpa suyop sa sawa ro anang kamandag sa batiis it daeaga. Nag balik rong kolor sa oyahon it daeaga, si Lolita ra ngaean. 

Halin kato, permeng nagabisita si Onyok kay Lolita. Owa mabuhaye, nag-asawa sanda ag una man guihapon naga estar sa kagueangan. /MP