Sugilanon Ni Tita Linda

Manogtukad it Bukid (Mountain Climber)

Ni Tita Linda Belayro

Abo rong ma ila-on magtukad it bukid. Isaea nga pag-ayat kanda kon andang matukad ag makaabot sa alipungto it bukid. Ro iba hay naga tagdok it bandera ag mag pakodak agod may madugang sa iba nandang na-abot nga kadungganan. Ro pagtukad it bukid hasta makaabot sa alipungto hay gina kabig nga dungog.

Si Brent hay isaea sa mga manogtukad  it bukid. Rondaya ro anang hilig halin pa ko maisot imaw. Tanan rong bukid sa andang lugar hay hasaka eon nana ngani bo-ot nana nga mag adto sa ibang lugar agod magpadayon sa anang nailaan. Nagpaha-om imaw it mabuhay. Nag abot rong adlaw nga haum eon imaw. 

Daea ro tanan nga gamit, sumakay imaw sa eroplano ag nagpadueong sa lugar nga anang tukaron nga bukid. Bangod sa malisod rong pagsaka it bukid, may tiyempo nga nagdupilas ro anang siki sa mga bato. 

Samtang naga init man rong silak it adlaw, naga dugang man rong kabudlay sa pagtukad. Matsa naga baga ro anang eawas ag guina kueang it hangin ro anang dughan. Ko ulihi, tinak-an imaw ag nagdesisyon nga magpundo. 

Guin tagdok nana ro anang bandera sa lugar nga anang guin tindugan, ag dali dali nga nana-og paadto sa hotel nga anang guina teneran. Pag-abot sa hotel guin tan-aw nana sa teleskopyo ro anang guin tagdukan it bandera. Abo guid ro anang kakibot kat hakita nana nga pila eon lang nga eak-ang ag idto eon imaw sa alipungto. Olihi guid ro anang pagno-oe. 

Kon guin dugangan nana ro anang pasensya ag pagtinguha, natuman kunta nana ro anang handum. Nadugangan eon man kunta ro mga hatukad nga bukid nga nagta-o kana it kadungganan. /MP