Sugilanon Ni Tita Linda

Agimat o  Anting- Anting?

Ni Tita Linda Belayro

Kon paea abuton ngani rong Semana Santa, ro mga guinatago nga Anting-Anting hay naga tukad sa bukid it Banahao agod mag padugang kong kusog ko andang guina buytan nga agimat.

Isaea eon si Viring nga kilaea sa andang lugar nga naga pamueong paagi sa anang anting-anting. Rondaya hay ana pa nga guin iridar sa anang  lolo parabil mamatay. Halin pa kato, guina pangayao imaw it mga may baeati-an, eabi guid rong guin kulam, guin patapunan, guina kaila-an it maeain nga espiritu ag iba pa nga mga masakit nga indi mabu-eong it mga doctor.

Ko isaeang adlaw, agahon pa, nagpahaum eon si Viring. Nagdaea imaw it pagkaon, banig ag tolda nga tueogan kon imaw maaeang-aeangan. Pag abot nana sa bukid it Banahaw hay hitsura it isaeang ka karnabal do lugar. Sari-saring mga de-kolor nga tolda rong nakatagdok. Abo ro nagabaligya it kandila ag mga pagkaon. Ro bukid hay guin obrang pamasyaran it mga kabataan. 

Sa pihak nga lugar it bukid hay may guinpatindog man nga entablado nga paga hiwatan it konsyerto.

Nageoya rong buot ni Viring. Abo eon ro pag bag-o kong lugar. Katong nagtaliwan nga mga dinag-on, malinong rong bukid. Kaabuan ko mga naga adto hay may mga masakit. Ro naga pangayao hay mga deboto eakip man ro may guina huptan nga anting-anting. Kaabuan ko mga tawo hay naga-usoy it milagro nga pisikal o materyal nga bagay.

Samtang naga tueok si Viring sa kabilugan kong bukid, hadumduman nana rong isaeang ka pelikula ni Nora Aunor hanungod sa milagro. Suno sa pelikula, owa kuno it milagro. Ro milagro hay una sa tawo. Kon imaw hay nagbag-o it guina tikangan nga daean. Kon imaw hay natawo it uman, guina eobong sa tubi ro anang eawas agod malimpyuhan ag sa anang pagtunga sa tubi, iba eon ro anang pagkatawo. Owa eon rong dati nga tinuga nga puno it kasae-anan kundi tawo nga may pagtu-o sa Diyos, royon rong pinaka mabahoe nga milagro.

Ro agimat o anting-anting hay sarang ika usar nga instrumento it dyablo agod mapata-eang rong tawo ag talikuran rong nagtuga kana. Paagi sa anting-anting guina buyo nana kita nga may gahum ro anting-anting ag sa ulihi mangin ulipon nana kita. Ro milagro it Diyos hay owa maki-ta sa guwa. Bukon it sa mga makangawa-ngawa ag tumaeagsahon nga makikita.

 Ro milagro it Diyos hay naga tuga ag naga kabuhi sa tagipusu-on it tawo. Owa naga hupot it dumot, naga handum nga mabuhi mo rong tawo sa pag obra it kamaeayran. Ag eabaw sa tanan ro pagkilaea KANA nga imaw rong aton nga manunubos ag nagtuga katon./MP