Sugilanon Ni Tita Linda

Ni Tita Linda Belayro

Perfectionista

Natawo sa mang-garanon nga pamilya si Betty. Sunod ro anang luho, nagatu-on sa maeahaeon ag pribadong kolehiyo. Guina sunod-sunod imaw ko anang yaya bisan siin mag adto. Halin man sa manggaranon nga pamilya ro anang ina ag ama, busa pirmeng owa sa Pilipinas tongod sa andang mga negosyo.
Bangud sa anang estado sa pagpangabuhi, nangin perfectionista si Betty. Bu-ot nana hay puro sadya-an ro anang palibot, gwapa ro anang yaya, mga maaeam ro anang kaatubang nga kaklase, mabuot ag manggaranon nga mga boyfriend ag amiga.
Sa anang opisina, bu-ot nana nga maga sunod ro tanan sa anang obsisyon, ag ro indi makasunod sa anang patakaran hay anang guina pahalin.
Isaeang adlaw, nakasub-eang si Betty it isaeang ka magueang nga naga pakalimos. Mahigko ro anang suksok, owa it tsinelas, nagalingo-lingo ro anang oeo ag kimpay ro anang alima. Guin punduhan nana ro magueang ag pahalinon sa kalye. Ro pobre nga magueang hay nag dungok eamang ag nagpaeayo. Pag-abot nana sa opisina, hakita nana ro anang guardiya nga naga pungko owa eagi imaw pagbuksi it puertahan. Nagdugang pa guid ro anang kaakig, ngani guin pahalin nana ratong guardiya.
Nakauli imaw nga mainit ro anang oeo. Guintawag nana ro anang yaya agod pahauman imaw it pagkaon. Sa pagdali-dali ko yaya, nasunog ro pagkaon. Sa anang kaakig, guin haboy nana ro pagkaon ag guin paukpan ro anang paboritong ayam nga naga katueog sa binit. Nagkagulo ro bilog nga baeay bangud sa anang kaakig.
Pagkaaga, sige ro anang singgit sa anang yaya, ogaling nagea-as nga owa nana masayuri. Owa man ro anang ayam kundi idto naga winarang sa kalye. Bu-ot nana mag paligos, ogaling owa it tubi ro gripo. Sa anang pag-ilis, owa it naga plantsa kana, ngani nag-adto imaw sa opisina nga yokot ro anang eambong.
Sa anang pagsueod sa opisina, hakita nana ratong magueang nga naga pakalimos. Bu-ot nana nga singgitan ro magueang ogaling owa it limog nga naga guwa sa anang baba. Bu-ot nana nga magtikang ogaling indi imaw maka hueag. Nalipong imaw ag pagbugtaw nana idto imaw sa ospital nga naka-dextrose eon ag manhid ro anang eawas. Nagpakita kana ratong magueang. Bangud owa kana it nagtatap, ratong magueang ro nagbantay kana. Mahaba ro anang toeog ko gabii ngaron. Pagbugtaw ni Betty, katoeog man rong magueang. Hakita nana ro mga pagkaon, de lata ag anang mga eambong. Naka batyag eon ro anang eawas ag maugan man ro anang pamatyag. Nag eaha imaw it pamahaw. Dayon nag eaba ag nag pamalantsa. Pagbalik nana sa anang kwarto, owa eon ro magueang. Nag uli imaw nga isaeahanon.
Naghimos imaw ag nag preparar agod mag-adto sa opisina. Eain eon ro anang pag-atubang sa mga empleyado. Nagbalik man ro anang yaya ag ayam kana.
Nagbalik man ro anang ama ag ina sa Pilipinas. Hakibot sanda sa pag bag-o ko andang onga. Malipayon sanda nga maaywan nanda ro andang negosyo sa mayad nga alima ko andang onga.
Halin kato, bukon eon it perfectionista si Betty. Kaantiguhan eon imaw mag-atubang sa mga maeaw-ay, may deperensya ag maskin bukon it maaeam.
Sa pangabuhi, malisud kon ikaw hay perfectionista. Bukon naton it buyot ro kauga-lingon nga paino-ino o pamatasan it iba. Eain-eain ro estado ko kada isaea nga indi naton masarangan nga pasun-don suno sa atong kabubut-on. Kon kaan-tiguhan kita magtan-aw sa kada isaea nga lipatan naton ro kakueangan nanda, maagum naton ro andang pagrespeto katon ag sa olihi, mapan-uhan naton nga indi eon naton sanda pagpiliton. "Unity in Diversity". /MP