Sugilanon Ni Tita Linda

Ni Tita Linda Belayro

Do–Re–Mi

May tatlong ka mag amigo nga sanday Do–Re–Mei. Suod guid ro andang pag amigo. Bukon it kumpleto ro sambato kon owa ro daywa. Kada isaea kanda hay may tinago nga kinaadman.

Si Do hay sarang maka unat ko anang alima agod maga haba. Si Re hay sarang man maunat ro anang le-og. Si Mi hay maka angkit man it maskin ano nga matig-a nga bagay.

Isaeang adlaw, guin sugo si Do ko anang nanay nga magsaka it niyog agod ipayok sa andang tinuea para sa ilabas. Sa bulig ni Re, nag ipo si Do it niyog. Anang guin unat ro anang alima agod maabot ro eahin sa ibabaw.

Pagkatapos, nga maipo ni Do ro niyog, nagpamasyar ro tatlo sa plaza ko andang banwa. May pabando ro hari nga maga ta-o it premyo sa sin-o man nga makakita ko singsing nga nahueog sa dagat. Habatian ko tatlo ro pabando. Busa, nag presentar ro tatlo nga mag eorop ko singsing sa dagat ag nabaton man sanda.

Unang guin unat ni Re ro anang le-og. Nag pang liaw-liaw ag hakita nana ro singsing sa idaeum it tubi sa dagat. Nag hueotikan ro daywa ag dayon nagsakay sa baroto si Do agod anang poeoton ko anang alima ro singsing. Nabo-oe nanda ro singsing sa tubi. Ogaling may nagtunga nga barakudang mabahoe nga isda nga may mataeum nga ngipon. Hakibot sanda busa, habuhian nanda ro singsing. Guin subad ag guin toeon it isda ro sing-sing. Guin pasakay nanda si Mi paadto sa dagat agod maki away sa isda.

Haabot gidman nanda ro isda. Paagi sa mataeum man nga ngipon ni Mi, ha angkit nana ro barakuda hasta namatay. Guin higtan ro isda ag guin daea sa takas. Guin kiwa ro tiyan ko isda ag guin usoy ro singsing sa anang tina-e. Hakita gidman nanda ro singsing ag habo-oe gidman nanda ro singsing ag premyo. Guin hueay ko tatlo nga mag amigo ro andang premyo. Nangin mga manggaranon sanda. /MP