Sugilanon Ni Tita Linda

Ni Tita Linda Belayro

Konde Dracula

Ro pangaean nga Dracula hay naga daea it kahadlok. Naga daea man it kakugmat tongod kakapid nana ro mga bampira nga naga inom it dugo it tawo agod sanda hay magpadayon nga buhi.

Kon kan-o natawo si Konde Dracula hay owa it nakasayod tongod naga pabilin nga bata pa ra anang hitsura owa naga gueang. Suno sa historya, nag eotaw imaw sa isaeang lugar sa Englatera. Sa anang pag eotaw, nagpakilaea nga isaeang ka konde nga manggaranon. Nakabakae imaw it isaeang ka kastilyo nga anang guina estahan. 

Kada gabi-e naga kangay imaw it mga kadaeagahan nga mga manggaranon ag de alta sosyudad. Magtungang gabi-e, may sambilog imaw nga guina kangay nga babaye nga daehon sa asotea ag angkiton ro anang le-og agod suyopon ro anang dugo. Kon maubusan eon it dugo ag mamatay ro babaye, ana dayon nga hueogon sa bintana nga owa it nakapan-o. Pagkaaga, may makita nga patay sa ubos it bintana. Ro konde pa ro ga paeobong ag magtao it bulig sa pamilya. 

Guina pataliwan anay nana ro mga pilang domingo ag dayon maga hiwat eon man it kasadyahan sa kastilyo. Tongod sa sunod-sunod nga krimen, na alerto ro mga kapulisyahan. Sa pagkangay eon man ko konde, nagpa-on sanda it isaeang ka babaye agod manmanan ro hueag it konde. Owa sanda magsaea. Pagka tungang gabi-e, hilong ro tanan. Guin daea it konde ro sangka babaye sa may asotea. 

Guina angkit eon kunta ko konde ro liog it babaye ogaling maabtik nga nakaabot ro mga pulis ag guin buno it daga ro konde nga human sa saway nga guin tugnaw sa benditadong tubi. Namatay ro konde. Guin paeobog sa kabaong nga normal nga anang katre. Owa eon it natabo nga krimen ag nalipatan man ro Pangaean nga konde Dracula. Tumaliwan ro mga dinag-on, may mga manakaw nga maila-on sa antigo nga bagay ag guin baligya sa maila-on magkasadya. Guin sueod nanda ro kastilyo it konde. 

Hakita nanda ro daga nga naga ungot pa sa dughan it konde nga may pueo nga bueawan. Guin gabot nanda ro daga ngani pumuswak ro dugo. Hinadlokan sanda busa nagpaeagiw.

Ko gabi-e ngaron, nagbangon si Konde Dracula agod mag usoy it dugo tongod sa kauhaw. Rikara eon man nag umpisa ro paghasik it lagim ni Kondre Dracula kaibahan ko anang mga kaapin nga bampira. /MP