Ni Tita Linda Belayro
Babaye Sa Parola
Ro parola maeapit sa pantalan ro guina obrang haeampangan ko mga onga kon adlaw nga owa it klase. Kon gabi-e, guina obra man nga warangan ko mga binata ag daeaga kapin pa kon mahayag ro buean.
May mga binatilyo nga managob eon naga uli. Isaeang bes, pag abot it alas dose, may hakita sanda nga isaeang ka babaye nga naka suksok it puti ag naga koe-koe imaw it eapsag. Guin paeapitan nanda ogaling golpe nga naduea. Nag eapta ro balita sa natabo. Agod mapamatud-an, nag kangay it mga tanod ro kapitan it barangay agod magbantay. Pag abot it alas dose it gabi-e, nagpakita eon man ro babaye nga may koe-koe nga eapsag.
Guin paeapitan ko kapitan ag guin singhan kon ano ro anang ikabulig. Naga tangis ro babaye hasta naduea.
Pagkaaga, guin usisa ko kapitan ro bilog nga barangay kon may krimen nga natabo. Guin usisa man nana ro andang listahan kon may natabo nga krimen. May hakita imaw nga lista it pagkamatay ni Perlita, isaeang ka kinse años nga babaye nga natip-eang it isaeang ka eaeaki nga may asawa.
Pagkasayod ko eaeaki nga naga daea o naga nabdos ro babaye, guin sampit nana ko gabi-e ngaron ro babaye sa parola. Suno sa pag usisa, idto nana guin patay ag guin eobong sa binit it parola. Owa naka sayod ro mga pumueoyo kon sin-o ro nagpatay kay Perlita. Owa eon man makita si Perlita sa andang lugar. Nag eaom sanda nga nagpanaw si Perlita sa Manila.
Ro kaeag ni Perlita hay naga pangayo it hustisya. Nagapakita imaw kada mahayag ro buean agod mapukaw nana ro mga binata ag matukiban ro natabo mga limang dag-on eon ro tumaliwan.
Guin kutkot nanda ro guin eobngan kay Perlita. Idto hakita ro mga toe-an ko pobreng dalagita.
Halin nga natukiban ro krimen ag haeobong sa sementeryo ro mga toe-an ni Perlita, owa eon imaw naga pakita sa parola. Owa man mabuhayi, may naka sugid kon sin-o ro nobyo ni Perlita nga guina patihan nga nagpatay kana. Hadakpan si Gomer ag guin preso. Owa imaw makabalibad tongod guina tub-eag imaw ko anang konsensya. /MP
No comments:
Post a Comment