Sugilanon Ni Tita Linda

Si Malikit Ag Rong Balyena

Ni Tita Linda Belayro

Si malikit hay unga it isaeang ka mangingisda. Paborito nana nga aeagtonan ro tago nga uengib sa pihak nga isla.

Isaeang adlaw, nagpanaw ro anang ama sa pihak nga isla. Nagsakay imaw sa anang maisot nga baroto ag nagpadueong sa paboritong uengib. Nagtener imaw sa uengib samtang nagaeobog sa maeapad nga bato. Bangod sa kaga-oy sa pagbinugsay, nakatoeogan imaw. Owa nana napan-uhi nga taob eon ag nagtinaas rong tubi. May nag-abot nga mga siokoy ag guindaea imaw sa idauem sa kaharian it mga kataw. 

Pagbugtaw nana, idto eota imaw sa tunga it mga kataw. Nag-abot rong Reyna it mga kataw ag boot imaw nga boe-on bilang prinsesa. Mabuhay eon gali imaw nga guinabinantayan kada adto nana sa uengib. Nakikita imaw sa bolang kristal nga guinahuptan it Reyna. Haum eon rong tanan. Guinkoronahan imaw bilang prinsesa. Nagpasugot si Malikit tungod owa imaw it natandaan ko anang nakataliwan. Malipayon rong tanan sa kaharian, eabi guid rong Reyna. Sunod rong nailaan ni Malikit ag maka-pagusto imaw it pamasyar puera eamang ro pagsueod sa kwarto nga itom ro puertahan nga guina bawaean ro tanan.

Tumaliwan ro mga inadlaw. Naduea man rong kahigayunan nga makita si Malikit ko anang guinikanan. Guina eauman nga guinkaon imaw it mabahoe nga isda o kundi naeonod imaw ag dinagsa sa mga kabatuhan hasta naeonot ro anang eawas. Samtang padayon bilang prinsesa si Malikit, naanad imaw sa pasikot sikot it kaharian. Hasta nakita nana rong kwarto nga itom ro puertahan. 

Guin samitan nana nga buksan ogaling masyadong matig-a. May nakita imaw nga tuktukon nga yabe sa ibabaw it mataas nga bato. Anang guin saka ag samitan nga abrehan ro puertahan. Nabuksan. Nakita nana rong botelya sa ibabaw it bato. Sa anang pagkawhat, nahueog rong botelya sa saeog ag na-oea rong sueod nga eana. 

Amat-amat nga nagbalik ro anang nakataliwan. Nahidlaw imaw sa anang pamilya. Dali dali imaw it guwa sa sekreto nga puertahan hasta nakaabot sa bukana it uengib. Nakita nana ro anang maisot nga baroto nga guin kamoyan eon it mga tanum nga halimunon. May nagpakita nga mabahoe nga balyena. Imaw gali ro nagtago sa baroto agod indi makita it mga tawo. May masakyan si Malikit sa anang pag-uli. Owa ngani naka eayo it mayad si Malikit, una eon ro mga siokoy naga eagas kana agod ibalik sa kaharian. Guintoeod ko balyena ro baroto hasta nakaabot sa pangpang. Nakauli imaw sa anda. Nagkita sanda ko anang mga guinikanan.

Owa it katapusan ro soguilanon hanungod sa pagkaduea ag pagkakita kay Malikit. Bangod sa pagdali-dali ni Malikit, owa nana nahubad ro anang korona nga puro perlas. Guin baligya nanda rong perlas ag rong kabakeanan hay guin gasto sa pagpatindog it baeay ag tindahan. Nagkabuhi it normal si Malikit kaibahan ko anang pamilya. /MP