Kanta Ni Tita Linda

Saea Nga Pagpabangod

ni Tita Linda Belayro

Isaeang ka “Call Center Agent” si Doris. Isaeang ka single mother ag may unga nga sambilog. Abo nga naga kahisa kay Doris sa opisina bangod sa anang pagkamaaeam ag mahugod pa. Bosa, napili-an nga “Outstanding employee” si Doris. Guintaw-an imaw it plake ag cash bilang premyo.

May nasapawan nga empleyado si Doris. Imaw si Flory nga kahilapit-baeay man ni Doris. Bangod nga owa imaw napili-i nga “Outstanding Employee”, buot nana nga makabaeos. Nag-usoy si Flory it paagi agud mapahuya si Doris. Parabil mag-adto sa opisina si Doris, may isaeang ka ea-eaki nga naga agi sa andang tangpa-an. Kon maguli ro ea-eaki ngara hay naga babay pa kana ro anang unga. Imaw ro nakikita ni Flory parabil imaw magpanaw sa opisina. Guinpamalita nana sa mga empliyado ro anang hakita. Umabot sa kaaeaman it manager. Guin patawag si Doris. Nakibot imaw it duro. Guinpangutana nana kon sin-o ro nagpamalita. Pagkasayod nana nga si Flory rong ugat it kaguluhan, guin hinyo nana nga magpatawag it miting ro manager. Guin kangay ni Doris rong eaeaki nga permeng nakikita ni Flory. Umabot rong tanan nga empliyado. Guin presentar rong tanan nga empliyado. Guin suguid ni Doris nga ro eaeaki hay owa it iba kundi anang ama. Guin unga imaw bago nag-asawa ro anang ama. Kada agahon, guina daehan nana it gatas ro anang apo, driber abi imaw it companya it gatas.

Pagkabati ko mga empliyado, mansig dungok sanda, eabi guid si Flory. Imbis nga pahalinun si Doris ko manager, guin taw-an it suspension si Flory. Tungod sa suspensiyon, nagdesisyon eon lang si Flory nga maghalin sa trabaho. Halin kato, owa eon it naga kontra kay Doris. 

Isaea guid matuod nga huwaran nga empleyado si Doris. Mabahoe rong respeto kana ko tanan nga empleyado. Mas malipayon sa tanan ro manager bangod owa imaw magsaea sa pagpili kay Doris bilang modelong empleyado. /MP