Suguilanon Ni Tita Linda

Mga Daeaga Sa Baylihan

ni Tita Linda Belayro

Rong Brgy. Hibong hay pinaka manggaranon nga barangay ko banwa it Nabas. Una kanda rong bueawan nga barko, may minahan pa it manganese ag may mga gwapahon pa nga mga daeaga.

Kon buean it Mayo, tiyempo it bakasyon ko mga kabinata-an ag kadaeagahan, abo guid nga bayle rong guina hiwat sa mga kabarangayan. May tatlong ka mga binata halin sa Poblacion it Nabas nga nagsaeampitan nga mamaylihan sa barangay Hibong. Pag-abot nanda sa sueod it baylihan, hay owa pa haeos it naga saot. Nagpahuway-huway anay sanda sa binit ag magbakae it sigarilyo. 

Ma-angan angan, may sumueod nga grupo it kababayen-an nga tanan gwapa. Dali-dali nga nagpaeapit rong tatlong sultero agod makasa-ot sa mga daeaga. Sadya-an guid ro sonata ag haeos indi pagbuhi-an ko tatlo ro andang mga pareha. Pagpundo it musika nagpundo man anay ro mga daeaga ag nageaong nga mapahuway anay sanda. 

Nagbakae man anay it tsiklet ro tatlo. Pagbalik nanda owa eot-a ro mga daeaga. Guin eagas nanda sa guwa ogaling owa sanda it hakita. Nagpangutana sanda sa ibang mga eaeaki nga una man naga sa-ot ogaling owa sanda it guin suguid.

May isaeang ka binatilyo nga naga tindog sa liwan it baylihan nga nakasayod ko andang guina usoy.

“Bukon it taga iya ro mga daeaga nga guina usoy ninyo. Taga ibang kalibutan ron sanda nga bo-ot man nga magkalipay apang limitado ro andang oras. Parabil mag-abot rong alas dose hay kinahangean nga maka uli eon sanda ay kon indi, maga sara rong puertahan ko andang kaharian ag indi eon sanda makasueod,” pahayag ko binatilyo. Naghambae pa royong binatilyo nga ro anang lolo hay isaea man nga nabiktima ko mga gwapahon nga mga daeaga ugaling anang guin sunod ro bilin ko anang lolo nga tan-awon rong ubos kong ilong ag ibabaw kong bibig kon pino ag owa it eob-eob. Kon pino ron, hay bukon it mortal royon nga daeaga kundi engkanto. Sanda ron hay naga kaduea nga indi nimo mapan-uhan.

Halin kato, owa eon nagbalik rong tatlo sa royon nga barangay. Abo matuod nga mga hitabo nga indi naton sarang matungkad. Ogaling pa ino-inohon lang naton nga may una nga mga tinuga nga maskin bukon it kapares naton nga mortal hay sanda hay kaparte man ko raying kalibutan. Aton eon lang sanda nga respituhon tungod nga rong andang kalibutan hay bukon naton it sakop. /MP