Sugilanon Ni Tita Linda

Ni Tita Linda Belayro

Moeto Sa Baeay Nga Tisa

Masyadong eagi eon rondayang baeay nga human sa tisa ko oras pa abi it Kastila guinpatindog. Pagkamatay ko tag-ana, owa man it unga nga nagpanubli sanda. Abo nga bu-ot mag estar sa rondaya nga baeay ogaling owa sanda nagabuhay tongod abo kuno nga misteryo ro una sa nasambit nga baeay. 

Suno sa mga nag estar sa rondayang baeay, may naga guyod kuno it kadena kon tungang gabi-e eon, may naga singgit nga naga patabang ag may naga kaeahoeog nga parte it eawas it tawo. Busa indi mabuhayan ag nagahalin ro mga naga estar sa baeay ngarang tisa. 

Isaeang adlaw, inuhaw si Sandy samtang naga bantay imaw ko anang mga anwang. Sayod imaw nga may gripo sa sueod it baeay nga tisa tongod una imaw magbahoe hasta guin pa ea-as sanda ko mapintas nga Don. 

Nag adto imaw sa baeay agod mag inom it tubi. Ogaling owa eot-a ro dating gripo sa liwan it baeay. Napilitan imaw nga magsueod. Abu ro hadumdoman hanongod sa baeay. Busa, tanan nga sueod hay anang guin buksan ag tan-awon. Sa isaeang ka sueod, may hakita imaw nga mga kadena, may sound system, may mga haboe nga puti ag may plastic nga parte it eawas. 

Nadumduman nana ro anang habati-an nga reklamo it mga bu-ot magbakae ko baeay eabi sa mga nagtiner una. Dali-dali imaw nga umuli sa andang baeay ag guin sugid ro tanan nga anang hakita sa anang ama. Pagbalik ko anang ama, dali-dali man nga nag adto sa pulis sanda ag guin sugid ro hakita ni Sandy. Guin pasayod sa bilog nga barangay nga may bu-ot magbakae ko baeay nga tisa ag maga umpisa it estar sa masunod nga adlaw. 

Ko gabi-e nga sumunod ngaron, may mga pulis nga nag ronda sa palibot. May nagpundo nga auto sa maeapit ko baeay. Isaeang ka eaeaki ro nanaog nga abo it daea.

Pagka gabi-e, naghalin eon ro pamilya una sa baeay. Umabot ro tungang gabi-e, may habati-an sandang guina guyod nga kadena, sumunod ro mga singgit nga naga patabang. Kon may naga guwa ngani, dayon man ro pag linopad it mga parte it eawas it tawo nga may mga dugo. Guin raid it mga pulis ro kwarto ag idto hadakpan ro isaeang ka eaeaki nga naga padaeagan ko tanan. Guin daea imaw sa estasyon it pulis agod imbestigahan. Nasayuran nga unga gali imaw it Don sa andang sueogo-on ogaling owa guina ako-a it Don. 

Guin papatay ro anang ina pagka unga kana. Guin tago ro onga agod indi masayuran kon siin. Nagbahoe ro onga ag nasayoran kon siin. Nasayran ro tanan paagi sa anang lolo. Kat napamatud-an it korte nga imaw ro onga it Don, guin pangaean kana ro baeay ag nagpasaeamat kay Sandy. 

Guin bo-oe nana nga kaibahan sa baeay si Sandy. Malipayon man ro guinikanan ni sandy. /MP