Sugilanon Ni Tita Linda

Ni Tita Linda Belayro

Titiris Ni Tess

Palangga guid si Tess ko anang Lola. Sa anang ika 18 dag-ong kaadlawan, guin taw-an imaw it regalo nga titiris nga nahuman sa panapton. Guin bilinan si Tess nga indi guid pagduea-on ro anang titiris, busa guina hulid nana ro titiris kon imaw magkatoeog. Ro ibang igkampod nana nga apo man ko anang lola hay bukon it maeapit sa andang lola tongod idto nagbahoe sa syudad. Kon bakasyon man lang sanda nagakita ko andang lola.

Ro guinikanan ni Tess, ag anang ama-kamanghuran sa mga onga ko anang lola ro naga atipan ko andang maeapad nga eanas. Ka’t nagmasakit ro anang lola, hay si Tess ag ro anang ina ro nag atipan kana. Owa man magbuhay ag binawi-an it hueam nga kabuhi.

Pagkamatay ko anang lola, nag oeoli eon ro anang mga tiyo ag tiya. Tag kinahatod eon ro anang lola sa anang ulihing paeahuwayan, andang guin hueo-eay ro mga propiyedad. Guin baligya ro baeay. Haadto ro eanas sa anang ama. Guin panghakot nanda ro mga mwebles ag tanan nga igdaeapat. Naghalin man sanday Tess sa maisot nga payag-payag nga dating guina bakasyunan nanda kon magpaani sa eanas. Rikara buhos ko anang ama ro anang tiyempo sa pag alila it mga hayop ag iba pang uma.

Tongod sa kahugod, nagmasakit man ro ama ni Tess. Kinahangean nga operahan imaw tongod may nagtubo nga bukoe sa anang likod. Nangayo it bulig sanda sa anang mga tiyo ag tiya ogaling amat-amat eon gali nga naubos ratong mga hueay nanda sa baeay. 

Ko isaeang gabi-e ngaron, nagpangadi si Tess ag ro anang ina. Pagkatapos it pangamuyo, nag adto sa anang katre si Tess agod magkatoeog. Anang guin tangdayan ro titiris. Sa anang paghakos sa titiris, hahulikapan nana ro mga matig-a nga bagay sa sueod it titiris. Guin boe-an nana it gunting ag tastason ro mga tahi. Tumambad kana ro mga papelon nga kwarta ag may nakaputos pa sa panyo nga mga antigong alahas ko anang lola. 

Guin daea nana ro titiris sa anang ina. Na operahan ag nagmayad ro anang ama. Owa nanda igbaligya ro mga antigong alahas tongod may sentimental nga hayga kay Tess. Kon ano ro natabo sa anang mga tiyo ag tiya hay owa eon it binate si Tess. Saeamat sa titiris nga regalo ko anang lola. 

Naga selebrar baea kamo it adlaw it mga lola? Mayad ayad man nga pagselebrar sa adlaw it mga lola! /MP