Sugilanon Ni Tita Linda

Ni Tita Linda Belayro

Bag-ong Pag-eaum

Ro kabuhi ni Soledad hay puno it kapait ag kasakit. Solo nana nga guin abaga ro pagpabahoe ko anang onga sa anang nobyo. Tag guina nabdos nana, guin aywan imaw ko anang nobyo ag nag asawa it isaeang ka manggaranon nga taga Cebu. 

Agud mapa bahoe ni Soledad ro anang onga, guin sudlan nana ro tanan nga trabaho. Nakatu-on ag nakatapos it Nursing ro anang onga nga si Cholie. Tag manog bo-oe eon it Board Exam si Cholie guin doble pa nana ro anang kayod agud maka tipon it kwartang pang review ro anang onga. 

Ko isaeang agahon ngaron, nagbugtaw si Soledad nga naga baga-baga (mainit) ro anang eawas ag indi imaw makabangon. Guin patumar it boeong si Soledad. Guin papahuway anay imaw. May nag agi nga newsboy sa andang kalye, nagbakae si Cholie. May habasahan imaw nga may naga usoy it caregiver. Nag eaong imaw sa anang ina nga anang agtunan ro lugar. 

Sa pag-abot ni Soledad, hasayran nana nga isaeang ka doña nga bag-ong halin sa Amerika ro naga usoy it caregiver. Nag eaong imaw sa anang ina para makabulig sa andang pagtipon it kwarta para sa anang pang review. 

Sa unang pagkita ni Cholie sa magueang nga doña, maugan ta eagi ro boot ko magueang sa daeaga. Bisperas it bag-ong dag-on, hakibot si Cholie nga may nag abot nga bisita si Doña Consuelo. Ro nag abot hay anang onga nga doctor nga bag-o eamang na biyudo sa Amerika. 

Si Dr. Artemio de Martin hay kilaeang siruhano sa America ag nag uli iya sa Pilipinas agud masayuran ro kahimtangan ko anang ina ag dungan man nga maka bakasyon. Iya man imaw mag sueang-sueang it Bag-ong Dag-on sa Pilipinas. 

Pagka bisperas it bag-ong dag-on, guin kangay ni Doña Consuelo ro nanay ni Cholie agod idto mag ihapon sa anda. Pagkakita ni Artemio kay Soledad, nagbugtaw ro mabuhay eon nga naga katoeog nga baeatyagon. Umpisa nga nagbueag sanda ni Soledad ag ipakasae sa babayeng naila-an ko anang ina, owa maduea sa huna-huna ni Artemio si Soledad. 

Makaron, nagkita eon man sanda ko anang onga. Indi matakos ro kalipay ni Artemio. Nangayo man it patawad si Doña Consuelo kay Soledad. Sa madaling suguilanon,  nagpakasae si Artemio ag si Soledad. Nagbo-oe it Board si Cholie ag nakapasar. Imaw ro nag atipan sa anang lola tongod nagpanaw sa Amerika si Artemio ag si Soledad agud tatapon ro ibang pagkabutang ni Artemio. Plano nanda nga iya sa Pilipinas mag panibag-ong pagkabuhi. 

Malipayon guid si Cholie tongod natuman nana ro anang handum nga mangin isaeang ka nars. Owa imaw it handum nga magpanaw sa ibang nasyon tongod imaw eon ro naga atipan sa anang lola. Makaron, bukon eon it puro pa-it ag kasakit ro nabatyagan ni Soledad. May ana eon nga kaagapay sa pag atubang sa anang bag-ong pag-eaum. /MP