Sugilanon Ni Tita Linda

Ni Tita Linda Belayro

Saeaming Nga Bukid

Ro saeaming nga bukid hay naga tunga kada beinte años, suno sa mga katigueangan. Ro nasambit nga bukid hay guina handum it kada isaea eabi gid ko mga kabataan tongod ro makasueod karon hay owa it paggueang. Ogaling bihira eamang ro makakita ag makasueod karon ay dapat ro tawo eamang nga may putli ro tagipuso-on. 

Sa isaeang ka lugar, nga may maeapad nga katamnan ag kaeati-an, malipayon nga  naga hinampang ro mga unga. Ro iba hay naga dakop it alibang-bang ag mga alisiw-siw. Sa indi kaeayu-an, may nakita nga mahayag nga butang sanda Tanya ag Marc. Guin adtunan ko daywa. Sa andang pag-eapit, nahueog ro guina tindugan nanda ag nagbuka. Nahueog sanda ag sa sueod sanda it puro saeaming. Abo nga mga onga idto nga naga hinampang. Puro pagkaon nga mga prutas ro palibot ag matsa owa it gutom idto. Tanan ro mga unga idto hay owa it paino-ino nga mag uli sa anda tongod puro kalipay ro andang guina batyag.

Samtang sa baeay nanday Tanya ag Marc, hay naga inusoy ro andang pamilya. Owa guid it nakakita ko saeaming nga bukid tongod ro may putli eamang nga tagipusu-on ro makakita. Nagreport sanda sa mga otoridad. Nagkagulo ro tanan sa pagkaduea ko daywa.

May isaeang ka monghe nga naga estar sa isaeang ka eongib ro andang nasubeang. Guin sugid ro tanan sa monghe. Tongod bag-o eamang halin sa pag ayuno ro monghe may nagtunga sa anang panan-awon ro isaeang ka saeaming nga bukid nga sarado. Nabasa man it monghe nga kinahangean ro pagsakripisyo it tudlo agod mangin yabe sa pagbukas ko pwertahan. Nagprisentar ro igmanghod ni Tanya nga si Alyza agod isakripisyo ro anang tudlo.

Tanan ro pamilya ni Tanya ag Marc hay nag ayuno. Pag abot sa pwertahan it bukid, guin potoe ro tudlo ni Alyza agod imaw ro pangbukas ko puertahan. Nabuksan ro puertahan ogaling nagsumpit ro dugo sa tudlo ni Alyza. Pagkakita ni Tanya sa nagadugo nga tudlo ko anang igmanghod, hadumduman nana ro anang pamilya. Dali-dali sanda nga nagguwa nga tatlo ag pagkaguwa nanda, naduea sa anda nga panueok ro bukid. 

Malipayon ro pamilya ni Tanya ag Marc. Pagkaduea ko bukid, nagbalik man ro mautod nga tudlo ni Alyza. Halin kato, owa eon nagpakita ro saeaming nga bukid. Magahueat eon man it beinte años agod magpakita ag para eamang sa may putli o malimpyo nga tagipusu-on nga haum nga magsakripisyo. /MP