Sugilanon Ni Tita Linda

Ni Tita Linda Belayro

Eaging Kastilyo

Sambato ro nasiong Englatera sa mga kilaeang abo ro dumaan nga Kastilyo. Rondayang kastilyo ro guina estahan it mga tawong may dugong hari-anon. Kaabu-an hay mga kaigbataan it hari o reyna. Ka’t mamatay ro katapusan nga hari, bihira eon lang nga mga duke, konde o baron ro naga tener sa Kastilyo tongod kaabu-an kanda hay nakaasawa eon. Idto sa modernong lugar naga tueo-on ro andang mga onga. Naga adto eamang sanda sa kastilyo kon magbakasyon o kon tiyempo it pagpangayam.

Si Duke Calixto nga igkampod it namatay nga hari hay namatay man nga owa it onga sa tunay nga asawa. Ogaling may onga imaw sa anang kabulig nga si Katrina. Pagkasayod ko dukesa sa hanabo kay Katrina ag sa Duke, guin paea-as nana si Katrina nga naga mabdos it limang buean. Parabil nagpanaw si Katrina hay guin taw-an imaw it medalyon ko duke nga owa nasayuri it dukesa.

Guin ta-o man ni Katrina sa anang onga nga si Almero ro medalyon. Anang guina kulentas hasta nag-abot imaw sa edad nga kinse dag-on.

Maila-on magmunot si Almero sa anang lolo kon magpahangeab it baka ag karnero maeapit sa eaging kastilyo. Ogaling abo guid ro pagbawae ko anang lolo sa pagsueod sa kastilyo. Maskin bawae, ro bata-on nga paino-ino ni Almero hay owa napunggi ka’t guin tuman nana ro tik-eod ko anang baeatyagon nga tukibon ro mysteryo ko eaging kastilyo.

Sinueod nana ro kastilyo nga owa nasayuri ko anang lolo. May hakita imaw nga mabahoe nga retrato sa kwadro nga bukon it iba kana. May guina kulentas ro eaeaki nga kapares ko anang medalyon. Guin suguid nana ro tanan sa anang ina ag lolo ro anang hakita sa sueod it kastilyo. Tongod karon, guin sugid eon lang ko anang ina ro tanan. 

Abo ro bu-ot mag angkon ko kastilyo. Ro iba hay naga pakuno-kuno nga igbata kuno sanda it duke ag dukesa ogaling owa sanda it pruweba. Guinpakita ni Almero ro anang medalyon. Guin pilit nga buksan ro bueawan nga palawit ag idto naka sa-ad nga tunay nga maga panubli ro naga angkon o naga hupot ko medalyon. 

Guin ta-o kanday Almero ro kastilyo. Guin kaayad ro kastilyo. Busa abo ro mga naga pamasyar ag naga pa retrato sa lugar. Una eon man naga estar sanday Almero. Ko olihi, nakakita imaw it simpli eamang nga babaye nga anang nangin asawa. Makaron, una sanda naga estar kaibahan ko anang lolo ag mga unga. Nangin duke man ko olihi si Almero tongod imaw man hay may dugong hari-anon. /MP