Sugilanon Ni Tita Linda

Ni Tita Linda Belayro

Magic Nga Libro

Paeahampang gid si Rosie. 

Ko hapon ngaron, guina-oy it hampang sa kompyuter si Rosie. Pagka gabi-e, hamuok gid ra anang katueogon. Nagdamgo imaw nga may magueang nga nagpakita kana ag guin taw-an imaw it libro. 

Pagbugtaw nana, may anang hakitang libro nga naka tungtong sa lamesa. May panit nga hapin. Guin buksan nana ro libro. Sari-sari ro kolor ko mga retrato ag matsa buhi kon ana nga tueokon ro mga tawo sa retrato. Sa sige nana nga pagbinukad, may nakita imaw nga sadya-an nga lugar. Naengganyo imaw nga tueokon ro mga retrato it kapispisan, kabukiran ag katamnan. 

Maangan-angan, naglingin ro anang oeo ag nagtiyog ro anang pamatyag. Sa anang pag muk-eat, idto imaw sa lugar nga nakita nana sa libro. Abo nga mga pispis ag alibang-bang ro naga libot-libot kana ogaling owa it tawo imaw nga nakita. Guin daea imaw sa isaeang ka mabahoe nga poetahan. Madueom ro sueod ogaling deretso sa mahayag ag maeapad nga ganghaan. May hakita man imaw nga babayeng naga pungko sa trono nga may korona.

“Malipayon nga pagbalik, Prinsesa Almera, pag aeaw-aeaw ko reyna. Imaw gali ro naduea nga onga nga prinsesa sa anang paghinampang sa kaeati-an ag idto tumugpa sa eogta sa katamnan nanday Mang Beryong ag Aling Luisa. Tongod owa it onga ro mag asawa, guin kabig nanda nga dogalingon nga unga ro prinsesa ag guin hingaeanan kay Rosie. Halin kato, owa naduea-i it pag eaum ro reyna sa pag inusoy sa prinsesa. Sa bulig ko mga pispis ag alibang-bang, hakita si Prinsesa Almera. Paagi sa libro, rondaya ro naging yabe nga maka balik sa kahari-an si Prinsesa Almera.

Mabuhay eon nga naduea si Rosie sa lugar nanday Mang Beryong ag Aling Luisa. Ogaling owa man sanda naga pundo it pag inusoy. Nag abot ro kahidlaw kay Rosie. Nag eaong imaw sa anang inang Reyna nga maka bisita sa anang guina kabig nga guinikanan.

Guin sugtan si Rosie sa anang pag panaw. Abo ro anang daea, mga prutas ag bueak. Nalipay ro mag asawa sa anang pagbalik. Guin saysay nana ro tanan. Masubo nga malipay ro mag asawa. Kada tatlong buean hay nagabalik si Rosie kanda. Ko olihi, tongod magueang eon ro daywang mag asawa hay nagmunot sanda sa Prinsesa agod idto. Owa eon sanda it problema sa pagkaon tongod bugana idto sa kahari-an ni Prinsesa Almera.  /MP