Sugilanon Ni Tita Linda

Ni Tita Linda Belayro

Batong Buhi

May kabuhi baea ro bato? Idto sa barangay malanday, sakop it Bohol, may isaeang ka bato nga guina patihan nga buhi. Saksi si Mang Pendong ko bato ngaron tongod maisot pa imaw hay isaeang ka maisot eamang rondayang bato ogaling sa pagtaliwan it dinag-on, nangin higante eon ro kabahoe it bato. Guina bawaean ko mga guinikanan ro andang mga unga nga mag eapit sa bato ngaron ay basi higupon sanda.

Isaeang adlaw, naga pamasyar si Enrico sa eanas maeapit sa bato, tag nag abot imaw halin sa syudad. Wiling wili guid imaw sa pagpinamasyar sa maeapad nga eanas ko anang lolo. Ko olihi, guina-oy imaw it tinikang. Busa, nagpungko agod mahuway. May nakita imaw nga mingko mabahoe nga bato. Busa, sumaka imaw sa bato ag idto nagpahuway-huway. Owa ngani mag init ro anang buli, may nabatyagan imaw nga parang naghumok ro anang guina pungkuan ag ko ulihi hay matsa may naga higop kana paidaeom. Nadueaan imaw it pangalibutan. Sa anang pagbugtaw idto eot-a imaw sa kahari-an it mga puting tinuga nga naga suksok man it mga puti.

Guin abi-abi imaw it pinaka Reyna it kahari-an. Guin pamasyar man imaw sa bilog nga palibot. Guina sinunod imaw it mga unga nga mapuea-puea it buhok ag puro naka biste it puti nga manipis. Guin taw-an imaw it pagkaon, ogaling nadumdoman nana ro andang leksyon sa eskwelahan, “Never accept food from strangers”. Nagpamalibad imaw ag nag pasaeamat sa mayad nga pag abi-abi kana.

Abo nga mga kabueakan ro anang nakita. Nadumdoman nana ro mga tanum ko anang lola. Nakabatyag imaw it kahidlaw sa anang lola busa nag ea-ong imaw nga mag uli.

Nagpasugot man ro Reyna. Haum man imaw nga batunon kon ano man nga oras imaw magbalik ag kon siin imaw maagi. Bilang regalo, guin taw-an imaw it pilang bilog nga batong diyamante. Sa anang pagbugtaw, idto imaw nagtunga sa bato nga mabahoe. Nag uli imaw. Owa man imaw magsugid maski kanyo kon siin imaw maghalin. Ro pag eaum ko anang lolo ag lola hay una eamang imaw nagpamasyar sa libot-libot.

Makaron, una pa guihapon ro bato. Ogaling guin tubu-an eon it mga eomot ag mga kahoy ro palibot. Owa eon man it mga unga nga naga hinampang tongod guina salipdan sa mata it tawo ro bato. Kon may una pa man nga naga estar nga ibang tinuga, paniempo eamang ro nakasayod. /MP