Sugilanon Ni Tita Linda

Ni Tita Linda Belayro

Modernong Romeo & Juliet

Sayod kita ko istorya ni Romeo and Juliet. Ro paghigugmaanan nga owa pagtaw-i it kahigayunan iya sa eogta, ogaling nag ueonongan sanda maskin sa kamatayon agod padayunon idto sa pihak nga kinabuhi.
Si Robert ag Alice hay guina kabig nga modernong Romeo and Juliet. Bata pa ro daywa, hay saksi sanda ko owa it pagkaeasugot ko andang mga guinikanan. Nag umpisa pa rondaya sa andang mga ka lolohan ag nagpadayon hasta sa oras nanday Robert ag Alice.

Nalisdan ro mga inunga ko daywang ka pamilya tongod guina pinahan sanda kon masayran nga naga kasugot sanda sa kada myembro it pihak nga pamilya. Ogaling, indi mapunggan ro paghiguga. Sarang mo mapapundo ro pag ilig it tubi ogaling ro paghigugma hay indi mapunggan ag maga usoy guid it paagi para eamang matuman ro dikta it tagipusuon.

Ro baeay nanday Robert ag Alice hay may mata-as nga pader ro naga separar. Ro guina obra ni Robert, amat-amat it pagtuhob it gabot sa pader agod idto nana guina sutsot ro anang sueat para kay Alice. Una man sa tuhob guina paagi ni Alice ro anang baeos. Iya man nana guina butang ro sabat kay Robert.
Owa guid makasayod ro andang mga guinikanan sa guina obra ko daywa. Ko olihi, nagkasugot sanda nga magtanan (ea-as). Nag pahaum sanda ag nagtipon it kantidad. Ko gabi-e ngaron, nagpanaw sanda. Nagsuksok sanda it biste it manog pakalimos hasta nakaabot sa pantalan. Pag abot sa siyudad, nag usoy sanda it maisot nga baeay agod maestahan. Nag umpisa sanda it pagtukod it maisot nga tindahan ag maisot nga karinderya.

Tongod sa andang kahugod, amat-amat nga nag umwad ro daywa. Pila eon nga bilog ro andang karinderya ag nakapatindog man it baeay. Duro ro kaakig ko andang mga guinikanan. Guin taw-an kuno sanda it kahuy-anan ko daywa, busa guin sumpa sanda ko andang mga guinikanan.

Owa sanda maka eskwela. Owa man it natapos ro andang mga magueang tongod guina bug-atan sanda ko pag inaway ko andang pamilya. Naubos man ro andang mga eogta sa pagpaboeong ko ama ni Alice samtang naka patay ro igmanghod ni Robert. Nasayran nanda ro natabo kat sekreto nga nag uli si Robert idto sa andang lugar.

Nag usoy it kilaeang doctor si Alice ag guin paadtunan ro anang ama. Pagmayad ko anang ama, hakibot sanda nga owa sanda pagsukta it doctor ay bayad eon kuno ro pasyente. Imaw man ro guin obra ni Robert, guin lakad nana nga maka guwa ro anang igmanghod sa presohan. Ka’t matawhay eon ro tanan, may nagpundo nga saeakyan sa atubang it daywang ka baeay ag nagpapanaog it mga gamit ag pagkaon. Pagpanaog ko daywa, hakibot ro andang pamilya kat may daywang ka onga ro nagdaeagan paadto sa tatay ni Alice. Duro ro kalipay ko tatay ni Alice. Imaw man ro tatay ni Robert kat nagbisa man ro daywang ka onga kana.

Owa it pinaka malipayon sa tanan kundi ro pamilya ni Robert ag Alice. Guin wasak nanda ro pader ag guin obrahan it maeapad nga “lawn” sa tunga. Malipayon man ro mga tawo nga nakasaksi tongod owa eon sanda naga pamatyag kon ano ro obrahon kanda kon masayran nga magpakitungo sanda sa kada pihak nga pamilya. Saeamat sa kaisog ag determinasyon nanday Robert ag Alice, ro Pilipino ag modernong Romeo and Juliet. /MP