Sugilanon Ni Tita Linda

Ni Tita Linda Belayro

Rosas It Disyerto

Hilig ni Milpah nga magsunod sa Karabana ko anang amang negosyante. Abo sandang mga kamilyo ag mga tawohan nga naga sunod sa pagtabok sa disyerto. Abo man sandang daeang baligya halin sa andang lugar ag ibaligya man para makabakae it mga gamit sa andang pagbalik. 

But-anan nga onga si Milpah. Kada pahuway ko andang karabana, imaw guid ro naga tatap ko andang tawohan ag pati pagkaon ko mga hayop. Naduduea ro kaga-oy ag kagutom ko mga tawohan kon makita nanda si Milpah. Sa andang pagpadayon, may haagyan sandang minuro nga guin sunog it mga Turko.

Guin patay ro mga eaeaki ag ha-aywan ro mga unga. Guin tatap nana ro mga unga ag guin pang boeong ro mga tatay nga guin ninahan ko mga kaaway. Guin taw-an man nana it mga haboe ag eambong ro mga nanay. Guin pakaayad anay ro mga kubol parabil sanda naghalin. 

Nakaabot sanda sa syudad. Andang guin baligya ro andang mga daea. Nagbakae man sanda it mga gamit ag pagkaon para sa andang pagbalik. 

Sa andang pagbalik, idto sanda nag agi sa pihak sa kinaandan nga rota. Ogaling idto gali kanda naga hueat ro mga traidor nga turko.

Mabuhay eon gali nga guina bantayan nanda ro grupo nanday Milpah. Pag ataki, owa it mahimo sanday Milpah kundi sumokoe. Abo nga tawohan nana ro naninahan ag mas kapin gid ro anang ama. Pagkakita ni Milpah nga natumba ro anang ama, binuytan nana ro armas ko anang ama ag mingko tigre nga nakipag baeaylohan it eopok sa kontra nga mga maisog nga turko. Nabuhi-an it kaisog ro anang mga tawohan. Sanda man hay nakipag away it owa it tupong hasta inigo it bala ag napatay nanda ro pinuno it mga turko. 

Naghugyaw ro mga tawohan ni Milpah. Nakakita sanda it bag-ong pinuno. Guin tawag nanda si Milpah nga Rosas it disyerto, mahugop ag mabuot sa mga maka eo-eo-oy ogaling maabtik ag maisog sa mga kaaway. /MP