Sugilanon Ni Tita Linda

Ni Tita Linda Belayro

Tueon-an Ni Tamara

Isaeang ka dalagitang taga Ehipto si Tamara. Unga imaw it isaeang ka archeologist nga naga trabaho sa pagkinut-kot ko mga dumaan eon nga siyudad una sa Ehipto.

Isaeang adlaw, may hakita nga eaging tueon-an si Tamara sa sueod it kwarto ko anang ama. Indi nana maintindihan ro mga nakasueat sa tueon-an tongod ibang hambae ro naka bae-hag. Indi nana matapos-tapos it panumdom kon ano ro bo-ot hambaeon it nakasueat sa tueon-an.  

Ko gabi-e ngaron, may habati-an imaw nga mingko tukar it musika halin sa tueon-an. Sa anang pagbukad, hakita nana nga naga hinueog ro mga letra sa kada tukar it musika. Guin daea nana ro tueon-an sa anang ama agod ipakita. Andang guin pamati-an nga daywa ro sonata. Indi man maeobtan ko anang ama. 

Pagkaaga, nag adto sanda sa library sa poblacion agod tukibon ro kahueogan ko mga letra. Sa bulig ko maaeam nga librarian, nasungka nanda ro kahueogan ko mga letra. Libro gali it isaeang ka prinsipe ka’t imaw hay bata pa. 

Guin sukot sanda ko andang kaaway agod boe-on kanda ro kahari-an. Ro anang amang hari hay may kaaeam. Nagpakut-kot it paeanagu-an idto sa idaeom it kahari-an, busa pagsukob it mga kaaway, owa it nakasayod nga ro pamilya gali hay idto nagpanago sa idaeom it eogta. 

Una tanan ro sangkap sa andang lugar. May mga tanum ag hayopan sanda. May naga ilig pa nga tubi sa busay. Sa kabuhayon eon, nag abo sanda ag nangin isaeang ka minuro ro andang lugar. Nag meron eon ro prinsipe ag imaw ro naga dumaea sa andang kaharian tongod magueang eon ro anang ama ag ina. Ro sekreto ko andang maeawig nga kabuhi hay halin sa dugos it ligwan ag pagkaon it polen nga halin sa mga bueak.

Una sa tueon-an mabasa ro andang manggad ag sa katapusan nga parte it tueon-an naka sueat nga bu-ot maka pag-asawa ro prinsipe sa kon sin-o man ro maka pabalik sa anang tueon-an. 

Sige ro pagkinut-kot ko mga tawohan ko ama ni Tamara, hasta hakit-an nanda ro sekreto nga daean paidaeom. Nagkita si Tamara ag ro prinsipe. Guindawat ni Tamara ro tueon-an ko prinsipe. Nag asawa sanda suno sa nakasaad sa tueon-an.  /MP