Sugilanon Ni Tita Linda

Ni Tita Linda Belayro

Recuerdo

Guin taw-an si Sharina ko anang lola it isaeang ka kulentas sa anang ika treseng dag-on nga kaadlawan. May palawit nga malibunog ogaling indi mabuksan. Suno sa anang lola hay mabuksan kuno ro palawit kon mag abot eon imaw sa edad nga dese otsong dag-on. Guin tago ni Sharina ro kulentas. Guina suksok eamang kon may okasyon. 

Sa pagtapos nana sa kolehiyo, natabu-an nga owa guid it kwarta ro anang ina. Dugang pa hay masakiton pa ro anang ama. Abo pa ro anang baeayran sa eskwelahan. Sa owa guina huna-hunaa, hakibot imaw nga nagbuka ro anang guina suksok nga kulentas. Sa pagbukas, may nahueog nga mga bato nga dyamante. 

Guin poeot ni Sharina ro mga dyamanate. Guin baligya nanda ro sambilog ko bato. Nagsarado eon man ro kulentas. Nagmayad ro anang ama. Naeobad nanda tanan ro andang mga kalisdanan. Nagpadayon sa pagtuon si Sharina agod mangin maestra. Tumaliwan ro ap-at nga dag-on, nakatapos si Sharina ag una nagturo sa andang barangay. Gwapa ag mabuot si Sharina. Abo nga binata ro naila kana. 

Isaea sa mga eaeaki nga naila kay Sharina hay onga it negosyante. Bu-ot nga eoguson ro dalagita agod maangkon ko unga’t negosyante. Sa owa it suko-suko, hadumdoman ni Sharina ro kulentas nga daea-daea nana pirme sa anang bag. Golpeng naghayag ro kulentas ag pinatama-an nana ro mata ko eaeaki nga may mahigkong katuyo-an busa, nabulag. 

Sa oras it katoeogon, nagabulig man gali ro kulentas. Pag abot sa anda, naabutan nana nga naga tangis ro anang ina. Bu-ot sanda nga pahalinon sa baeay nga guina estaran tongod bu-ot ibaligya ko tag-ana kay Don Agaton, sangka tawong may una-una. Guin pahalin eon ngani ro mga eskwater sa lugar ngaron. Ro iba indi mag-halin busa guin pangsunog ro andang baeay eakip man ko baeay nanday Sharina. 

Bu-ot nga bawi-on ro eogta nanday Sharina. Agod matun-an ro kamatu-oran ag mabu-oe ro hustisya, nag adto sanda sa abogado. Guin pangutana ko abogado kon pila ro kantidad tanan ko eogta. Bu-ot nanday Sharina nga bak-eon maski dobly ro presyo, mabawi eamang kay Don Agaton. 

Pa agi sa kulentas ko anang lola, natubos ni Sharina ro eogta. Guin patindogan nanda it baeay ro mga eskwater. Nagpatindog man imaw it eskwelahan sa lugar ngaron ag imaw ro naga dumaea ag magbulig it turo sa mga onga nga owa it bayad. 

Imaw ro guin kilaea nga pinuno ko mga eskwater ag nangin bukang bibig ro pangaean ni Sharina De Veyra, bangod sa Recuerdo.  /MP