Sugilanon Ni Tita Linda

Ni Tita Linda Belayro

Espading Ni Marikudo

Si Marikudo ro hari it mga Ati. Pag abot it mga datu sa isla it Panay halin sa Borneo, nagkasugot sanda sa mga dumueo-ong. Guin baligya nanday Marikudo ro kapatagan nga maeapit sa suba ag nagpadueong ro mga Ati hasta sa may dueonan it bukid Madyaas.

Ro baylo ko eogta hay bueawan nga sarok ag bueawan man nga kulentas. Bu-ot pa ko mga datu nga pangayu-on ro espading ni Marikudo nga may pu-eo nga bueawan ogaling indi pag ita-o ko hari tongod duyon ro simbolo it gahum nana bilang hari. 

Nagpadueong ro mga Ati idto sa tunga it kagueangan. Tumaliwan ro mga inadlaw, indi mapaea sa huna-huna it isaeang ka datu ratong espading ni Marikudo. Busa, nagpadaea imaw it taga bantay sa lugar it mga Ati. Natukiban ko taga espiya nga permi gali nga naga pahuway-huway ro hari sa idauem it puno it dap-dap, maeapit sa suba. 

Ko agahon ngaron, ka’t nagpahuway ro hari, guin kamang nana ro espading nga naka tak-eos sa kilid it hari. Ogaling, ka’t anang pagbuyot sa espading, golpeng nag alsa ag nagtiyog-tiyog. Pagtugpa ko espading, nahueog sa ueo it espiya. Naninahan ro espiya ag namatay. Nagbugtaw si Marikudo ag pagkakita sa patay nga espiya, nagbangon imaw ag guin pueot ro espading nga matsa owa it natabo. Sayod imaw kon ham-an it namatay ro espiya. 

Halin kato, owa eon it nagmitir nga takawon ro espading ni Marikudo. Pagkamatay ni Marikudo, daea man nana hasta sa eobnganan ro anang espada. Kutob sa mga naga handum nga kut-kuton ro anang eobnganan agod takawon ro espading hay tanan napaslawan. 

Makaron, guina patihan nga una pa nakaeobong ro espading. Tongod abo eon nga nag bag-o sa lugar nga anang eobnganan, owa sanda nakasayod kon siin guid kampi naka eobong ro espading.

Basi ikaw bu-ot man nga mag angkon ko espading ni Marikudo? /MP