Sugilanon Ni Tita Linda

Ni Tita Linda Belayro

Si Mariang Ueang

Simpli eamang nga babaye si Maria. Owa guid it naga pangasawa kana tongod owa imaw it hilig sa kasadyahan. Parabil mamatay ro anang ina, guin bilin imaw sa anang tiya nga may mga onga nga daeaga nga ka edad nana. Guin alila–an nanda si Maria, eabi guid ko anang igkampod nga si Sita.

Kon may okasyon ro daeaga, puro sugo imaw ag tanan ro obra sa baeay hay ana pa. Pagka gabi-e, gaoy nga gaoy si Maria ogaling naga bangon pa imaw kon mag abot si Sita halin sa kasadyahan.

Ko isaeang agahon ngaron, nagbueaw si Maria. Busa owa eagi imaw naka eaha it pagkaon. Tongod karon, guin paeaba imaw nga owa pagpakan-a. Deretso imaw sa suba. Idto nana guin buhos ro anang sakit it bu-ot. 

“Kon buhi pa kunta si Nanay hay owa nakon naagumi rondayang kalisod”, pagpanangison ko daeaga. Sa tonga ko anang panaeambiton, owa nana mapan-uhi ro mga ueang nga naga hukop kana. Pagka pan-o nana, anang guin dakop ro sambatong mabahoe nga ueang. Hakibot imaw kat nabati-an nana nga naga hambae eon ro ueang. 

“Indi ka magkasubo, Maria. Iya kami kimo naga bulig”, hambae it ueang. “Tan-awa ro imong palibot”, dugang pa guid it ueang. Paglingot nana, hakita nana ro mga prutas ag mga ha guyam-ot. Nagpaayaw-ayaw imaw it kaon hasta naka batyag imaw it kabakod. 

Halin kato, owa nagabalibad si Maria maskin ano ro ginasugo kana. Permi pa imaw nga mabaskog ag malipayon. Nangawa ro mag ina sa mga hueag ni Maria. Ngani guin man-manan nanda si Maria. Ko agahon ngaron, guin sundan nanda si Maria sa suba agod mag eaba. Hakita nanda nga naga estorya si Maria sa mabahoe nga dueang. Pag oli ni Maria, nagpakita si Sita sa mga ueang. Guin sugo ro mga ueang nga daehan man imaw it prutas ag suea. Nagpanaw ro mga ueang ag maangan-angan, may nag aeabot nga prutas ag suea ogaling puro eonot ag eob-ok pa. 

Sa anang kaakig, guin pang haboy ko daeaga ro mga prutas. Sa anang pag hinaboy, hadanlog imaw ag nahueog sa suba. Nagpangoy-pangoy imaw ag guin hukupan imaw it mga ueang agod angkiton. Nag uli imaw nga abo it nina. Dogang pa, nag eaw-ay ro anang hitsura.

Samtang guin paea-as nanda si Maria. Guin buligan ko mga ueang si Maria. Nagpatindog imaw it baeay ag nag entra sa negosyo. Malipayon man imaw nga naga binulig sa mga pobre nga naga kinahang-ean. /MP