Sugilanon Ni Tita Linda

Ni Tita Linda Belayro

Naga Ginhawa Nga Bukid

Sa kahaba-on ko bukid it Sierra Madre, may guina patihan nga may una nga naga ginhawa nga lugar ko bukid kato anay. Rondaya hay nagtuhaw pagkatapos it mabaskog nga linog. Abo nga mga hayop, pamaeay ag mga tanum ro nagkaeaduea tongod sa linog.

May isaeang ka bakero nga naga bantay ko anang mga baka ag anwang kat hakita nana nga naga buga-buga it kaeayo ro bukid. Sa anang kahadlok, nag uli imaw sa anda ag guin sugid ro hakita sa anang lolo.

Suno sa anang lolo, unang nagtuhaw ro pagginhawa it bukid ka’t imaw hay maisot pa. Suno pa guid sa anang lolo, guin sumpa ro higante nga naga estar sa mabahoe nga yungib tongod abo ro anang guin halitan nga mga kasapatan. Sa pagsumpa kana, maga balik ro anang pagginhawa nga guin eobong sa bukid pagkatapos it sanggatos ka dag-on.

Nagtaliwan eon ro sanggatos ka dag-on, ag pagkatapos it mabaskog nga linog, napukaw ro higante. Busa, naga buka-buka ro bukid kon mag ginhawa ro higante. Bangod sa abo eon man nga kabuhi ag katamnan ro naduea ag nagkaeasamad, duro guid ro kaakig ko mga tawo. Nag paino-ino sanda kon paalin mapapundo ro pagbuka-buka it bukid.

Ko gabi-e ngaron, nagdamgo ro bakero. Nagpakita kuno kana ro isaeang ka magueang. Guin sugo imaw ko magueang nga usoyon ro higante nga naga katueog sa isaeang ka uengib. Kun makita nana, magpotoe imaw it buhok ko higante ag ihaboy sa nagabuka-buka nga bukid. 

Habugtaw ro bakero. Anang guin tuman ro sugo sa anang damgo. Nag padueong imaw sa pag usoy sa higante. Hakita nana nga naga katoeog ro higante. Madahan nga guin gaeab nana ro buhok it higante. Dayon dali-dali nga nag adto sa naga ginhawa nga bukid. Mabakas nana nga guin pilak ro buhok. Sa owa magbuhay, owa nag-uli ro pagbuka ko bukid.

Owa masayuri kon siin nag adto ro higante. Basi namatay. Ro buka nga bukid hay nangin aeagyan it mga tawo ogaling kon agyan it mga saeakyan hay naga kurog ro eogta.

Makaron una pa ro bukid sa Sierra Madre ogaling owa eon naga ginhawa. /MP