Sugilanon Ni Tita Linda

Ni Tita Linda Belayro

Tim-Tang-Tong

May tatlong ka magmaeanghod nga puro may mga gahum, may andang anting-anting. Ka’t madali eon lang mamatay ro andang lolo, sangka arbolaryo, guin tawag nana sanday Tim-Tam ag si Tong.

Guin taw-an nana si Tim it gahum nga maka pa bahoe it tiyan it tawo nga sarang magamit nga sakayang tubi. Si Tam hay guin taw-an man it gahum nga maka pahaba ko anang alima. Samtang si Tong hay makakita it maskin nano ka eayo. Ro bilin ko andang lolo hay gamiton eamang ro andang mga gahum sa kamaeayran it banwa ag kadagaya-an. 

Isaeang adlaw, nag saeampitan ro tatlong magmanghod nga mag sapaearan sa banwa. Tag idto eon sanda sa banwa hay may nabasa sanda nga pahisayod sa plaza. Rondaya hay paindis-indis nga kon sin-o ro makakita sa singsing it prinsesa nga guin haboy sa dagat hay makabaton it mabahoe nga premyo. 

Nag entra ro tatlo. Nagpabahoe it tiyan si Tim. Sumakay sa mabahoe nga tiyan ro daywa nga si Tam ag Tong. Pag abot sa tunga-tunga it eawod, guin usoy ko mata ni Tang ro singsing. Owa magbuhay ag hakita nanda ro singsing. Pagkakita nana ko singsing, guin pahaba ni Tam ro anang alima agod boe-on ro singsing sa idaeom it tubi. Malipayon sandang nagbalik sa pang-pang. Guindaea nanda ro singsing sa palasyo it hari. 

Guin taw-an sanda it mabahoe nga premyo nga kwarta ag alahas. Nagkasugot man ro tatlo nga mag-asawa eon sanda. Nakakita sanda it babayeng mahimong andang mangin asawa. Ogaling naga hilikawan ro kada isaea kanda. Nasangagan ro tatlong ka magmanghod, busa guin gapos nanda ro tatlo ag guin daea sa isaeang ka isla nga kumpleto ro mga pagkaon. Guin pasakay sanda kay Tim nga tiyang habok. 

Ka’t abo pa sanda it pagkaon, owa sanda naga mueod-an. Ogaling tag naubos eon ro andang pagkaon hay nagkasugot eon sanda. Nagpatindog sanda it payag-payag agod may masilungan. Nagpananum sanda ag nag alila it mga hayop nga bugana una sa isla. Tanan hay owa nalipod sa andang mga asawa tongod nakikita sanda ni Tong. 

Guin sueang sanda ko andang mga asawa. Man sig-uli sanda sa andang mga baeay ag nagpangabuhi it malinong. Halin kato, owa eon naga ilinaway ro mga babaye tongod naga hugod sanda sa andang kada baeay. Malipayon man ro tatlong ka magmanghod nga sanday Tim, Tam ag Tong sa nakikita nanda nga pagbag-o ko andang mga asawa. /MP