Sugilanon Ni Tita Linda

Ni Tita Linda Belayro

Unang Baeangaw

Isaeang ka mangunguma nga mahugod ag binata si Gabillo. Abo ro anang mga tanom ag guina alilaang hayop. Agod indi masueod ro anang mga tanum it mga hayop, anang guin butangan it kurae ag guin tampukan it maeagko nga bato ro mga haligi agod magalig-on ag indi matumba. Ko isaeang agahon, sa anang pagbugtaw, hakita nana nga samad eot-a ro mga kurae ag nagkaea apok ro mga bato. Ana eaging guin kaayad ro kurae ag guin tipon ro mga bato. Mayad ayad eon ro anang uma.

Ogaling pagkaaga eon man sa anang pagbugtaw ag pagbisita hay wasak eon man ro mga kurae. Nagakalhit eon man ro mga bato. Tongod sa naga katabo, naga libog ro anang oeo kon sin-o ro naga wasak, ro naga samad ko anang kurae. 

Ko sumunod nga gabi-e, timprano pa si Gabillo nag ihapon. Nag umpisa imaw it pagbantay. Owa pa magnagob ro gabie, maangan angan, may kahayag nga nagtuhaw halin sa eangit. Anang guin bantayan. May nagtugpa nga tatlong ka babaye nga puro may pakpak. Ro andang suksok hay eambong nga puti ag manipis. Nag umpisa sanda it paghinampang. Guin hukas nanda ro andang pakpak, guin sab-eay sa kurae ag guin hinaboy ro mga bato. Tongod kara, hakilaea ni Gabillo ro mga naga winasak ko anang kurae. 

Agod maka baeos imaw, guin tago ni Gabillo ro andang mga pakpak. Owa magpakita si Gabillo. Sa mabuhay man nga pag hinampang, guina-oy ro tatlo. Mansig-usoy sanda ko andang pakpak. Hakita ko daywa ro andang pakpak ogaling owa ro ay Amilah ay idtot-a kay Gabillo. Agod indi sanda maabutan it pagsubat it adlaw, nag eopad ro daywa ag haaywan ro kamanghuran nga si Amilah.

Nagpakita si Gabillo kay Amilah. Owa it mahimo si Amilah kundi magsunod kay Gabillo ag nag iba sanda. Sa mabuhay eon, ko olihi, nag asawa sanda. Nangin mabuot nga asawa si Amilah ni Gabillo. Nagkaunga sanda it isaeang ka babaye. Nagtaliwan ro mga dinag-on ag nag abot ro oras nga guina hidlaw it duro si Amilah sa anang guin halinan. Isaeang adlaw, tag naga hampang ro anang onga, nagsaka imaw idto sa kisame. May hakita imaw nga pakpak. Guin hueog nana sa saeog ag guin tawag ro anang inang si Amilah. Pagkakita ni Amilah ko pakpak, dali-dali nana nga guin suksok ag guin hakwat ro anang unga agod mag eopad hasta makaabot sanda sa anang kaharian. 

Pagkahapon, umuli eon si Gabillo. Owa eon nana makita ro anang mag ina. Guin saka nana ro kisame ag hatun-an nga owa eon ro pakpak. Malipayon nga nagkilita ro pamilya ni Amilah. Idto sa eogta, nangin masubo si Gabillo. Napabayaan eon nana ro anang mga tanum ag mga hayop. Rondaya hay owa malipod ro tanan kay Lumawig. Naeo-oy imaw kay Gabillo busa nagpakita imaw sa binata paagi sa damgo. Guin sugo imaw nga sa pag abot it tungang gabi-e may makita imaw nga eobid nga naga tunton halin sa eangit. Magsaka imaw paibabaw agod makita ro anang mag ina. Guin tuman ni Gabillo ro tanan. Matu-od man ro anang damgo. Nagkita sanda ko anang mag ina. Malipayon sanda ag haeos indi sanda magbueag sa andang pagkita. 

Ogaling, sayod ni Amilah nga malisod magbuhay sa ibabaw si Gabillo tongod isaea imaw ka mortal. 

Nagdangop imaw kay Lumawig. Agod maeobad ro problema, Nag paobra it tulay si Lumawig nga naga angot sa eogta ag eangit. Rondaya ro guina agyan ni Gabillo kon magbisita sa anang mag ina. Imaw man ni Amilah ag ko anang unga kon magbisita sanda sa eogta. 

Agod madali makita, guin butangan ni Lumawig it sari-saring kolor agod maskin gabi-e hay makita nanda kon sanda hay magsaka ag panaog. Halin kato hay nagatunga ro tulay nga may sari-saring  kolor nga puea, orange, dueaw, berde, asul, violeta ag indigo. 

Rondaya ro unang baeangaw nga aton nga makita sa eangit, ro tulay nanday Gabillo ag Amilah nga naga angot sa eangit ag eogta. /MP