Sugilanon Ni Tita Linda

Ni Tita Linda Belayro

Sekreto Sa Lampara

Pagkamatay ni Senyor Gustavo ag Senyora Dolor hay guin baligya ko andang unga nga si Sergio ro andang antigo nga baeay. Guin pahalin ni Don Sergio ro andang mga sueogo-on ag nagpanaw imaw sa syudad nga owa it nakasayod kon siin imaw naga estar. Owa man it habilin kundi ro kabulig nga si Adore nga imaw ro guin bilinan nga limpyuhan ro baeay.

Hakita ni Adore rong eaging lampara nga nagaligid sa binit. Rondaya ro ginagamit it Senyora kon imaw hay naga pailaw samtang guina hueat nana ro anang asawa halin sa sosyalan. Guin daea ni Adore ro lampara sa andang baeay agod limpyuhan. Ko gabi-e ngaron, hakibot imaw nga ham-an naga hayag ro lampara nga owa man pag pahayaga. Guin kaeog ni Adore ag guin ling-ling pa ro sueod. Tag anang guina ling-ling, nahueog ro anang boeoytan. Sa sueod it tubo hay may hakita imaw nga binalilin nga papel. Anang guin bugnot agod makita kon ano ro sueod Sa anang pag bugnot, tumambad ro mga papelon nga kwarta ag antigo nga alahas. Naghipos eang si Adore sa anang hakita.

Pagkaaga, sekreto ro mag ina nga nagpanaw sa syudad. Nagbakae si Adore it mabahoe nga baeay ag nagpatindog it negosyo hasta nga nagmanggaranon. Tumaliwan ro napueong dag-on, bumalik imaw sa andang lugar nga isaeahanon tongod namatay man ro anang ina. Binalikan nana ro antigong baeay ogaling may naka kabit nga plaka, “for sale”. 

Sa anang pag pangusisa, indi makatakod ro tag iya sa mga sangag ag maka haeadlok nga naga katabo sa baeay. May naga linagsan ag naga guyod it mingko kadena ro nababatyagan. 

Bumalik kay Adore ro nagtaliwan. Si Don Gustavo hay mapintas kay Donya Dolor.

Sobra ro anang kaimon ag anang guina gapos it kadena ro donya kon mahilong. Agod indi maubos ro andang kwarta, guin tago ko Donya ro anang alahas agod indi ika taya sa sugae ko Don. Owa mabuhayi, namatay ro Donya sa sobrang kasakit. Haaywan ro andang onga nga si Sergio kay Adore hasta nagbahoe ag idto nagtuon sa syudad.

Makaron, nakabalik si Adore ag bu-ot nga bak-eon ro baeay. Ag ana mat-ang habakae. Guin papintorahan nana, guin pa bendisyonan anay parabil imaw mage star. Anang guin kangay ro anang igkampod agod mag atipan. Guin obra nana nga bakasyunan ro baeay kon bu-ot nana nga magpahuway. /MP