Sugilanon Ni Tita Linda

Ni Tita Linda Belayro

Naga Baga-Bagang Eoha

Natawo nga normal si Narda sa isaeang ka maisot nga payag. Maskin mawron man, ogaling may tumaeagsahong natabo ko isaeang agahon ngaron nga nagdaea it kakugmat sa mag asawang Ana ag Andoy. Kon magtangis si Narda, ro kutob eoha nga naga toeo sa anang guina tugpaan hay naga kaeayo. Busa, nagkagulo ro bilog nga pamilya. Agod malikawan nga indi eon mauman, guina liga nanda si Narda agod indi guid magtangis. Andang guina ta-o ro ana tanan nga nailaan agod maka likaw sa pagtangis. 

 
Guin usisa nanda ro kabangdanan ko tanan. Suno kay Ana nga ina ni Narda, ka’t naga nabdos imaw, isaeang agahon hay nag eaba imaw maeapit sa bubon. May umigo nga kilat kana ag nalipong imaw. Sa ana nga pagmuk-eat, habatyagan nana nga naghinueag ro onga sa ana nga tiyan, ogaling owa nana pagbaliha hasta natawo ro eapsag nga normal ro anang pag unga. 

 
Tongod sa mayad ayad nga pagtatap sa unga, nagbahoe si Narda nga paeangta nga naga tangis. Una abi ro anang ina ag ama nga naga bantay kana. Isaeang adlaw, tag naga hampang si Narda sa idaeum it punong santoe, nahueogan imaw it anang bunga. Tumama sa anang oeo. 

 
Tongod sa kasakit, tumangis imaw. Tag naga tangis si Narda, nag dab-dab man ro mga patay nga dahon kutob sa matueo-an it eoha. Dali-dali man nga sabya it tubi nga haum eagi permi sa andang baeay agod matapna ro kaeayo.

 
Nagbalik si Narda nga una lang permi sa baeay. Guina likaw nanda imaw sa ibang mga unga tongod owa sanda it gustong masayuran ro anang minatuod nga kahimtangan. Owa imaw nag adto sa eskwelahan. Busa, bukon it malipayon si Narda. Hasta nga nagdaeaga imaw hay ro andang baeay ag ugsaran eang ro anang kalibutan. 

 
Ko isaeang agahon ngaron, may isaeang ka binatilyo nga nahanaeang sa lugar ni Narda. Hakita imaw ko binatilyo ag nabihag ta eagi imaw sa ka gwapa ni Narda. Nagbinalik balik imaw ag sa kaeo-oy ko ina ni Narda, guin sugid nana ro tanan kay Cedric. Bu-ot buligan ni Cedric si Narda tongod ro anang lolo hay may gahum man nga maka painit it tubi paagi sa anang alima. Tongod mayad ayad man ro katuyu-an ni Cedric, nagsugot ro ginikanan ni Narda. Idto sa eungib guindaea si Narda. 

 
Rikara nagpuasa ro lolo ni Cedric. Owa imaw it guina kaon kundi tubi eang halin sa busay.

 
Ko una nga adlaw, guin ninahan ro anang alima ni Narda agod masakitan. Nagtinangis si Narda, nagtinubod ro anang eoha. Kon magkaeayo ro palibot, guina sabyahan dayon nanda it tubi. Sige nga tangis ni Narda ag sige man nga ininom it tubi sa busay. Hasta naubos ro kainit sa anang eawas nga dueot it kilat. Nag amat-amat it eamig ro anang eawas.

 
Sa katapusan nga kiwa kana it kutsilyo, owa eon nag baga ro eoha nga naga tueo. Duro guid ro andang pasaeamat kay Cedric. Siguro, hueog man imaw it eangit para kay Narda. 

 
Ko olihi, nag asawa si Cedric ag si Narda. Malipayon sanda ay maeapad eon ro kalibutan ni Narda nga bukon it sa andang baeay ag ugsaran eamang. /MP