Sugilanon Ni Tita Linda

Ni Tita Linda Belayro

Boy Negro

Owa it permanente nga baeay si Boy Negro. Makita imaw maskin siin nga kalye sa andang banwa. Una imaw naagahan sa bangketa. Paeangta eang imaw naga uli sa anang Lola sa lugar it mga skwater. Ko isaeang agahon ngato, habugtaw si Boy Negro sa tonga it ka gab-ihon tongod sa singgit it mga tawo. 

 
May guin hold-up sa lugar nanda. Husto guid nga naga paadto kana ro nag hold-up. Busa anang guin abangan. Natumba ro hold-upper ag nabawi ro bag. Guin daea sa presento it pulis ro nag hold up. Guin uli sa babaye ro bag nga isaeang ka manog saot gali sa Olonggapo City. Guin daea nana si Boy Negro bilang body guard sa pagtamod it mayad ayad nga binohatan. Idto, abo ro nangin kilaea ni Boy. May mga Amerikano ag mga hapon ro pirme nanang kaibahan. 

 
Permi man imaw sa barrack it mga Kano hasta nakilaea imaw it isaeang ka manog retiro nga opisyal nga Amerikanong Negro. Guin bo-oe imaw nga driver. Samtang naga trabaho imaw, maugan guid ro bu-ot kana ko anang amo. Guin usisa nana si Boy kon taga siin ag kon sin-o ro anang mga ginikanan. Sabat ni Boy Negro, “patay eon ro akong ina. Nagbahoe ako sa akong lola”. Agod makilaea guid it mayad ro anang pamilya, nag adto sanda sa baeay ko anang lola. Sa pagsueod eagi nanda sa baeay, hakita ko anang amo ro retrato ni Loleng nga ina ni Boy Negro. Ro anang lola ro nag panaysayon nga si Loleng hay nagtrabaho bilang waitress sa Olonggapo ag nag uli lang kana ka’t manog unga eon. 

 
Natawo ro anang onga ag guin hingaeanan nana nga si Boy Negro tongod maitum ag kulot it buhok ogaling gwapo mat-a. Halin nga namatay ro anang ina, una eon sa eoyo ko anang lola nagbahoe si Boy. Owa man naka tapak sa eskwelahan si Boy kundi sa kalye naga tiner.  

 
Matsa habugtaw sa madueom nga katoeogon ro amo ni Boy Negro. Nag uli sanda sa Olonggapo City. Parabil naghalin, guin taw-an ro lola ni Boy it kwarta para ibakae it pagkaon. Pag abot sa Olonggapo, nagpa DNA test sanda nga daywa ag positibo ro resulta. Magkadugo sanda. Parabil magretiro rong opisyal nga negro, guin pangaean nana kay Boy ro anang ari-arian. 

 
Guin patindogan it baeay ro maglola. Pegretiro ko anang ama, nag uli imaw sa America sa anang pamilya. Malipayon si Boy Negro tongod nakilaea nana ro anang ama ag makaron owa eon imaw sa kalye naga estar. May anda eong mabahoe nga mansion sa Paranaque, pa arag ko anang ama. /MP