Sugilanon Ni Tita Linda

Ni Tita Linda Belayro

Rebulto Ni San Pedro

Ro mag asawang Don Pepe ag Donya Rita hay may tatlong ka ongang puro eaeaki. Sanda ro may pinaka maeapad nga eogta sa andang lugar. Sanda man ro bugana it kwarta. Bangod karon, sanda ro guina adtunan it mga tawo agod mahueaman. Andang guina prenda ko mga tawo ro andang igdaeapat sa don ag sa donya. 

Sunod man ro tanan-tanan nga naila-an ko andang daywang ka onga nga eaeaki hasta nag asawa sanda ko andang nobya halin man sa alta sosyodad. Padayon ro pag ginasto ko daywang ka onga samtang nangin kabulig nanda sa pag asikaso ko andang kaeaparan nga oeomhan ro kamang-huran nga unga nga si Renato. 

Nagmasakit it kanser si Don Pepe. Guindaea sa Amerika ro don agod idto magpaboeong. Amat-amat nga guin baligya ro andang mga eogta hasta naubos. Pati ro baeay hay guin potika man sa bangko agod ro kwartang hinueam hay ipaboeong sa don. Naubos ro manggad it don. Ro baeay hay guin imbargo pa it bangko ay uwa sanda it ikabayad sa guin hueam nga kwarta.

Naubos eon ro manggad ni Don Pepe ag Donya Rita. Tongod sa kueang eon it kwarta nga ipaboeong, nag maiwat si Don Pepe hasta namatay. Owa man magbuhay, nagmasakit man si Donya Rita ag namatay man imaw.

Owa eon mag uli ro daywang ka mga onga it don tongod sa kahuya sa mga tawo sa andang tinubu-ang lugar. Nag pana-og sa dating baeay sanday Renato ag anang pamilya ay guin bo-oe eota it bangko ro andang baeay. Idto sanda mag estar sa andang dating kamalig. Guin himos man it bangko ro baeay agod ibaligya. 

Hakita ni Renato ro rebulto ni San Pedro nga guin tuohan ni Donya Rita. Guin daea nana sa anda ag guin butang sa lamesa. Matsa may naga kaeog sa sueod it rebulto. Anang guin pasuli, hakita ni Renato nga may gabot ag may sueod nga papel. Anang guin kuhit ro sueod, nahueog ro mga alahas ag mga papelon nga kwarta. 

Agod indi sanda pagdudahan, guin tago nanda ro alahas ag amat-amat nga guin deposito sa bangko ro kwarta agod sa ulihi hay gamiton sa pag eskwela it mga unga.  /MP