Sugilanon Ni Tita Linda

Ni Tita Linda Belayro

Panyo Ni Catalina

Sa isaeang ka lugar, may sangka bulag. Sambilog eonlang ro makakita ko anang mata. Si Catalina ro anang ngaean. Naga pakalimos imaw sa Poblacion. May naghueog kana it panyo nga puti samtang naga pakalimos imaw ko agahon ngaron. May masakit abi ro anang ina busa patay huya nga nagapakalimos imaw agod ibakae nana it bueong ag pagkaon sa anang ina. 

Guin poeot nana ro panyo ag guin hugom. Mahumot nga mayad ro panyo. Anang guin singhot. Nakabatyag imaw it pagkabusog bisan owa pa imaw naka pamahaw ko agahon ngaron. Nag uli imaw ag guin pakaon ro anang ina sa anang guin bakae nga noodles sa tindahan.

Pagkaaga, nag pakalimos eon man imaw. Maeapit sa anang naka-hamtangan, hakita nana nga may natumbang babaye. Guin daeagan nana ag guin pa hugom ro panyo. Nagmayad eagi-eagi ro babaye. Madasig nga tumindog ag pumanaw nga mingko owa it natabo. Hangawa si Catalina. 

Pag uli nana ko hapon ngaron, anang guin samitan nga ipahugom man ratong panyo sa anang ina. Mingko pinahid ro masakit ko anang ina. Nagbaskog ag nakabalik sa pag-eaba ro anang ina.

Pagkaaga, may umagi man kana nga isaeang ka eaeaki nga may mabug-at nga guina pas-an. Pumundo, naglingkod ag nag pahuway. Guin buligan nana ro magueang nga makatindog. Guin pangutanan nana ro magueang kon nano ro anang guina pas-an. Nagsabat ro eaeaki. “Rondaya ro mga kasae-anan it mga tawo. Bu-ot ko nga tubson ro mga tawo agod indi mapabilin sa kuko it diyablo ag maka agom it kabuhi nga owa it katapusan”. 

Dayon mabakas nga naduea ro eaeaki. Nagpaeanindog ro baeahibo ni Catalina. Nagminatu-od ro anang habati-an nga sermon it pare. Guin tan-aw nana ro anang panyo ag may naka marka it oyahon ko atong Gino-o nga nakahurma kat anang guinpahid sa uyahon it eaeaki. Halin kato, guina gamit nana rondayang panyo sa mga masakiton, sa mga tawong naga problema ag sa mga pobreng maka eoeo-oy. 

Nagpabilin nga daeaga si Catalina hasta imaw namatay. Parabil imaw mabugto-an it guinhawa, guin hinyo nana nga buytan ro panyo, agod sa pagkita nana sa atong Gino-o, imaw ro maga uli ag magpasaeamat sa guin ta-o kana nga kahigayunan nga makabulig sa anang isigkatawo paagi sa panyo. /MP