Sugilanon Ni Tita Linda

Ni Tita Linda Belayro

Punta It Tunnel

Halin sa pigadong pamilya si Nelly. Onga imaw it pobreng ginikanan. Owa eon ngani imaw maka padayon it pagtu-on pagkatapos it “High School” tongod namatay ro anang ama. Nangin madueom kana ro paeaabuton tongod sa kapobrehan.

Naga labada eamang ro anang ina ag imaw ro naga bulig una sa pamaeay bilang kamagueangan nga onga. Tag naga usoy it kabulig ro guina labadahan ko anang ina, guin sungbil nana si Nelly agod magmunot idto sa Manila nga mangin kabulig. Sa owa guina huna-hunaa, may mabahoe nga negosyo gali ro anang ha adtonang amo. 

Tongod maila-on sa negosyo ro dalagita, nag bolontad imaw nga mangin tindera. Guin butang imaw nga tindera ag guina saligan si Nelly ko anang amo. Guin turo kana ro mga paagi sa negosyo. Pagkataliwan it pilang buean, nakilaea nana ro isaeang ka eaeaking negosyante man, baeo ag owa man it onga. 

Nagkasugot sandang mag iba nga matsa mag asawa man. Manami ro andang pagsinaeayo busa nagdayon ro andang pag iba hasta nagpakasae. Nagpundar sandang mag asawa ko andang dogalingong negosyo hasta nag umwad ro andang pagpangabuhi. 

Nag uli si Nelly sa anang dating barangay agod boe-on ro anang pamilya. Owa haeos it nakakilaea eon kana. Halipat eon kana ro andang mga kahilapit. Ibang Nelly ro andang hakita. Bukon eon it mahuya-on ag pobreng daeaga nga puro kadueom kon anang tan-awon ro anang paeaabuton. 

Ha-eampasan eon nana ro madueom nga “tunnel”, hakita eon nana ro kahayag. Guin pamatod-an nana nga owa it guina ga-id sa kapobrehon sa tawong naga sukoe ag desidido. 

Nagpahaom si Nelly it abo, sari-sari ag manamit nga mga pagkaon. Anang guin kangay ro anang mga igbata ag nag “party” bilang pasaeamat sa Diyos sa mga grasyang nabaton. 

Makaron, abo kana nga nagakilaea eabi guid ro mga pulitiko. Kada piyesta sa andang baryo hay naga uli gid imaw agod maka-iba sa anang mga igbata, dating ka eskwela, ag mga amiga nga guina kahidlawan man nana. /MP