Ni Tita Linda Belayro
Alima It Amo
Isaeang ka sikat nga negosyante si Mr. Carlos. Naga linibot imaw sa iba-ibang lugar it kalibutan. Kada uli nana, may daea imaw nga regalo sa anang asawa. Mga maeahaeon nga relo, bag, alahas, sapatos ag kon ano pa nga daea sa anang pag uli.
Ko olihi, nasum-oe eon ro anang asawa nga si Susy sa anang eokas. Ko olihi, ro anang bu-ot mabaton hay mga misteryoso nga butang sa pag uli ni Mr. Carlos. Busa, parabil umuli imaw halin sa India, nag libot anay si Mr. Carlos sa mga bazaar agod mag usoy it anang e-regalo sa anang asawa. Ogaling owa gid imaw it napili sa anang hakita. Nag balik eon lang imaw sa hotel. Sa anang pag agi sa kalye, may hakita imaw nga alima it amo. Suno sa tinderong Indian, may kinaadman ro alima it amo nga masayran ni Mr. Carlos kon may naga traidor kana sa anang mga amigo, ka trabaho o sa anang panimaeay.
Guin bakae ni Mr. Carlos ro alima it amo. Nag uli eon si Mr. Carlos. Pag abot nana sa anda, malipayon guid si Susy tongod pinasahi ro guin eokas kana sa ibang mga koleksyon. Guin pa obrahan nana it eskaparate agod indi pag sudlon it tagasaw ag iba pang sapat. Sa owa magbuhay, nag panaw eon man si Mr. Carlos sa ibang nasyon.
Sa anang pag uli it uman halin sa ibang nasyon, haabotan nana sa andang baeay nga may eaeaki gali ro anang asawa. Mabuhay eon gali ro andang relasyon, ogaling owa guid nana maaboti. Tongod sa gahum ko alima it amo, hadakpan man nana ro pag eo-ib ko anang asawa. Nangayo it pasensya ro anang asawa. Halin kato, guina daea eon nana ro anang asawa sa anang paglibot sa bilog nga kalibutan. /MP
No comments:
Post a Comment