Friday, March 15, 2013

Sugilanon Ni Tita Linda

Ni Tita Linda Belayro

Pugad It Eamang

Naga limpyo it kamalig si Lily ko agahon ngaron. Madali eon lang ro tig-aeani ag kinahangean nga limpyohan ro andang kamalig agod butangan ko andang aning paeay ag mais. Samtang naga linimpyo si Lily, may hakita imaw nga mga pugad it eamang. 

Hadumdoman nana ro sugid ko anang Lolo nga may manggad nga dueot ro eamang. Guin buksan nana ro sambilog nga pugad. May numero nga 564 ro anang hakita. Guin butang nana sa anang boesa ag nagpanaw imaw sa banwa.

Hakita nana ro mga babaye nga naga paeay sa bingo. Nagtaya man imaw paagi sa numero nga anang hakita sa pugad it eamang. Nagdaog ro anang numero. Nagbakae imaw it mga pagkaon ag guin uli sa anang mga igmanghod. 

Halin kato, sige-sige ro anang pag inusoy it pugad it mga eamang. May una nga nakasueat nga numero ogaling ro iba hay owa man it numero. Dagaya ro guina binuksan nga pugad it eamang ni Lily. Ro kutob may numero hay ana nga guina tay-an. Sige-sige man ro anang pag dina-og.

Ko gabie ngaron, nagdamgo si Lily nga nagpakita kana ro Reyna it mga eamang. Guin usoy kana ro mga onga it eamang. Duro ro mga itlog sa pugad nga guin pang samad ni Lily. 

Nag aeabot man dayon ro abo nga mga namok ag ibang insekto. Owa eon it naga kaon kanda tongod owa eon it mga eamang nga naga kaon. Ro mga itlog nga dapat mangin eamang sa ulihi hay nagkaeamatay tongod sa pagsinamad ni Lily it mga pugad it eamang. Imaw ro guina basoe ko mga eamang. 

Bu-ot imaw nga patyon ko Reyna it mga eamang. Nagdaeagan imaw ag naha bugtaw. Naga hangos imaw nga nagbangon. Uminom anay imaw it tubi ag nag adto sa kamalig. Abo eon man nga mga pugad ro anang hakita ogaling owa eon nana pagbuksi.

Bu-ot nana nga mag abo ro mga eamang, isaeang ka insekto nga kaapin ag kabulig ko mga tawo. /MP

No comments: