Thursday, January 30, 2014

Sugilanon Ni Tita Linda

Ni Tita Linda Belayro

Tatlong Ka Mag Amigong Hayop

Mabuhay eon nga nag serbisyo si King Kabayo sa anang amo. Imaw ro hari it karera ag abo nga kwarta ro guin duhoe nana sa pagdinaog sa karera. Ka’t imaw hay magueang eon, guina dapat pa guihapon imaw nga mag pas-an it mga dinaea. Ka’t indi eon imaw makatakod magpas-an, guin akigan imaw ko anang amo, busa nag ea-as imaw. Nag panaw nga owa nakasayod kon siin imaw makakita it pagkaon. Sa anang pagpinanaw, may nakita imaw nga ayam nga masubo ra hitsura nga naga eoko sa kilid it karsada.

Guin paea-as man dayon ko anang amo tongod nasangagan sa pag linahay kon gabi-e. Indi hikatoeogan ro anang amo tongod sa pag linahay nana. Busa, guin tabog imaw. Naeo-oy ro kabayo sa ayam ngani anang guin sampit agod mag-usoy sanda it makaon. Nagsunod ro ayam. Sa indi kaeayuan, may naagyan man sanda nga kuring nga sige nga inukay it basura agod may makaon. Ro kuring hay nagsunggod man sa anang amo bangod umpisa nga may guin uli nga pispis sa hawla hay owa eon imaw guina inatwa. Guin hun-an pa ngani imaw nga patyon kon anang kan-on ro pispis. 

Nagpanaw ro kuring sa kahadlok sa anang amo. Makaron hay naga inukay imaw it basura. Sang adlaw eon abi nga owa imaw maka kaon. Nagmunot imaw sa daywa. Nag abot ro kahapunanon. Pareho guid sanda nga gutom. Sa unahan, may nakita sanda nga baeay nga mahayag ag masadyahon nga naga kinanta ro mga tawo sa sueod. Bu-ot nanda nga masayuran kon may ano nga kasadyahan sa baeay ngaron. Tongod mata-as ro baeay, tumongtong ro ayam sa kabayo, tumongtong man dayon ro kuring sa ayam. Nakita ko kuring nga mga manakaw gali ro naga ilinom ag naga kinanta sa isaeang ka lamesa nga puno it pagkaon.

Nagplano ro tatlo kon ano ro obrahon agod maka kaon. Nag porma sanda it isaeang ka banda. Dueongan sanda nga magsinggit samtang naga pundag ro kabayo. Ro ayam hay nagpatik sa dingding ag ro kuring naga kaeos sa haligi. Nakibot ag hinadlukan ro mga mananakaw. Gumuwa ro sambilog sa pwertahan ogaling inangkit imaw ko ayam nga naga bantay. Ro sambilog hay umagi sa bintana pero sinipa imaw it kabayo. Ro sambilog man hay kinoeba-an ag idto nanago sa may dapog. 

Bu-ot nana nga magsigarilyo ogaling halipatan nana ro anang lighter sa lamesa. May nakita imaw nga baga sa dapog. Sa anang pagsindi, bukon gali it baga ro naga siga kundi mata it kuring nga nagsiga sa madueom. Kinaeos imaw sa mata ag nagtiyabaw nga dumaeagan sa likod it baeay. Sumueod ro tatlo ag magpaayaw-ayaw sa pagkaon. Dayon sanda nga nagkatoeog tongod sa kaga-oy. Halin kato, sanda eon ro nangin tag-ana it baeay. /MP

No comments: