Sugilanon Ni Tita Linda

Ni Tita Linda Belayro

Olihi Nga Pagno-oe

Owa’t pangita si Hanz, busa nag presentar maskin anong trabaho ro una nga matakuran nana. Guin baton imaw bilang manog alila ko mga baboy it palasyo. Abu it abilidad rayang si Hanz. Sa owa magbuhay, naka embento imaw it kawa, isaeang ka eaha-an nga kon magbukae ro guina ea-ha hay naga hugom ro manami nga putahe ag naga tunog ro maintok nga lengganay kon tamaan it aso.
Isaeang adlaw, habati-an it prinsesa ro sadya-an nga tunog it mga lengganay. Nanaog imaw. Sa anang pag guwa, nahumgan nana ro sadyaan nga guina eahang putahe. Nangoryoso ro prinsesa. Bu-ot nana nga bak-eon ro eaha-an. Indi igbaligya ni Hanz sa cash. Kon bu-ot guid nana bakeon, ibaligya ni Hanz ka baylo it sang gatos ka haro. Naakig ro prinsesa. Tongod sa naila-an guid nana, ko olihi, nagpasugot lang imaw. Guin libutan imaw ko anang mga dama agod owa it makakita nga guina haruan imaw it isaeang ka manog-alila it baboy. Nakabati ro hari sa paghinuyap ko mga dama sa kada haro. Nag pamintana ro hari agud makita ro naga katabo sa guwa.
Hangawa ro hari, ham-an masangag? Na-naog imaw. Tama man nga madali eon lang matapos ro sanggatos nga haro. Bangud sa kaakig it hari, guin pa ea-as nana si Hanz ag guin padaea kana ro prinsesa. Nagdayon sanda sa isaeang ka maisot nga baeay nga owa it mga igdaeapat. Nagmino-eo moeo ro prinsesa. Indi imaw magkatoeog bangud bukon kuno it mahumok ro katre. Indi imaw magkaon bangud bukon it manami ag indi imaw mag-hikut it pagkaon ay indi man imaw ka antiguhan.
Guindaea imaw ni Hanz sa isaeang ka suba. Sa tabok kara hay sangka kaharian man. May nagahueat nga baroto nga andang guin sakayan. Sa pihak nga pangpang, abu nga tawo nga nagdapit kanda. Guin saluduhan si Hanz ko mga tawo. Isaea gali ka prinsipe si Hanz ko royong kaharian. Sa sobra nanang kaila sa prinsesa hay nagpakuno-kuno imaw sa palasyo, ogaling ka’t hatukiban nana ro owa it sayod nga pamatasan ko prinsesa, naduea ro anang gana. Guin aywan nana ro prinsesa ag nagpanaw sa ibang lugar. Nag uli sa andang palasyo ro prinsesa. Sobra ro anang pagno-oe bangud ulihi eon. Nag bag-o baea ro prinsesa sa anang ugali? Owa ako makasayod. Tukiba. /MP