Wednesday, August 21, 2013

Sugilanon Ni Tita Linda

Ni Tita Linda Belayro

Kulam

Kilaeang kilaea ro pangaeang Sedes o Mama Des sa lugar nanda. Mga pulitiko, mga negosyante ag mga may mataas nga posisyon sa gobyerno ro anang mga kakilaea. Guina kahadlukan man imaw tongod sa anang gahum nga guina huptan. Guina bayaran imaw ko mga kleyente kon may guina pasakitan o guina pa kulam. Guina taw-an imaw it paunang bayad ag kon mag epekto eon hay dayon impasan imaw. 
 
Halin kato, sige ro anang hakot it kwarta. Ag naga pamasyar pa sa ibang nasyon. Pam-an imaw naka bo-oe it gahum ngara? 
 
Si Sedes o Mama Des hay halin man sa pobre nga pamilya. Owa man imaw nakatapos sa elementary nga eskuylahan. Nahikaw imaw sa ibang mga onga tongod may mga ginikanan nga naga sakripisyo para makatapos it pag eskwela. Halin nga guin aywan si Sedes ko anang ama, guin sumpa nana ro anang ama. Haaywan pa kana ro pagpabahoe sa anang daywang ka igmanghod. 
 
Owa mabuhayi ag namatay man ro anang ina sa masakit nga tuberkulosis. Puro eang kalisod ag dumot ro sueod ko dughan ni Mama Des. Guin sumpa nana nga maga manggaranon man imaw maskin sa anong paagi. 
 
Ko isaeang gabii ngaron, puno it kapait ag dumot ro sueod ko anang dughan. Sa anang katueogon, nagdamgo imaw. Isaeang ka eaeaki nga naga eambong it itum ag naka kapa it puea ro nagpakita kana. Guin pangutana imaw kon ano ro problema nana. Nagsabat si Mama Des nga buot imaw nga maka baeos sa mga tawong nag pigos kana. Buot man nana nga mag manggaranon. Guin taw-an imaw it isaeang ka titiris ag dagom nga agoha. Sayod imaw kon ano ro anang obrahon. Halin kato, abo ro mga tawo nga naga pabulig kana. Ro anang kabuhi-an hay nag mayad ayad. 
 
Naga ilig lang ro manggad kana, busa naangkon nana ro mga bagay nga dati hay owa nana hisamiti. Bukon eang it matunog ro anang pangaean, guina kahadlukan pa si Mama Des. Ogaling, owa man mabuhayi ro tanan. Nag abot ro adlaw nga tapos eon ro taning. Pagkataliwan it 20 dag-on, paga bawi-on kana ro gahum. Kaeakip kara hay ro pag hunos ko anang kaeag nga anang guin prenda kabaylo ko gahum.  
 
Ko gabi-e ngaron, nagpakita eon man kana ro eaeaking naka itom. Guina daea eon imaw. Bu-ot nana nga mag pangayo pa it plasos tongod owa pa imaw maka pahaum kon siin nana aywan ro anang mga manggad. Dugang pa, owa pa imaw maka pangayo it kapatawaran sa anang mga nangin kaaway. Ogaling indi eon magsugot ro eaeaki. 
 
Ko gabi-e eagi ngaron, guin daea imaw ko eaeaki nga owa it nakasayod. Pagkaaga, nakita rong patay nga eawas ni Mama Des, sa tunga ko anang mga alahas ag kwarta. Nangin paealigban sa bilog nga kapulisyahan ro anang kamatayon tongod owa man it buhin ro anang manggad. 
 
Siin makaron ro kaeag ni Mama Des? Basaha eon lang ninyo sa inyong Bibliya kon siin nag adto ro kaeag kapares ko ay Sedes o Mama Des. /MP 

No comments: