Ni Tita Linda Belayro
Ro Eaging Kahita
Samtang naga pauli si Bertong Bulldog halin sa eskwelahan, may hakita imaw nga eaging kahita sa basurahan.
Madasig nanang guin pueot ag guin sueod sa anang boesa. Pag abot sa andang baeay, dali-dali eagi nanang guin bukad ro kahita. Ogaling sa anang pag usisa, owa it nakita nga sueod. Anang guin pilak ro kahita. Ogaling, pag eagpok, hay matsa puno it sensilyo ro tunog. Guin pueot ni Bertong Bulldog, pagbukad it uman hay mga sensilyo ra sueod. Busa, sinueod eagi nana sa buesa, matsa mabug-at ro anang daea. Ro kaheta gali hay puno eot-a it kwarta tag naga tinikang eon si Berto.
Tongod sa kahita, halin kato, owa eot-a nawad-i imaw it kwarta. Bangod sa abong kwarta, nag pundo eon imaw sa pag adto sa eskwelahan. Idto imaw permi naga babad sa sugae-an, sa mga nightclub ag sa daeagkong katipunan. Ro pangaeang Bulldog hay guina kahadlukan it ibang tawo. Owa imaw nahadlok maskin sa mga otoridad. Kwarta ro anang pambala kon ano man ro anang obrahon. Sarang nana nga mabakae ro tanan.
Umabot ro adlaw nga owa eon imaw it guina taha-an nga mga tawo sa gobyerno. Abo man kunta imaw it amigo ogaling naga eapit eamang kana kon may kinahangean.
Isaeang adlaw, may magueang nga nagpakalimos kana. Bukon eang sa owa nana paglimosi, ana pang guin tabog ro magueang. Dungan sa pagtabog sa magueang, natabog man ro mga kwarta sa kahita. Amat-amat nga naubos hasta maskin sangka sentimo hay owa eot-a it habilin kay Berto. Tongod kara, guin pilak nana ro kahita.
Naglingo lingo eon lang ratong magueang. Ro magueang gali ro tag ana it kahita. Nagbalik ro kahita sa basurahan ag kon sin-o eon man ro makapueot hay owa nasayuri. Naduea it golpi ro magueang. Halin kato, owa man nasayuri kon siin eon ratong eaeaki nga golping nag manggaranon nga golpi mang nag pobre. Kon ay Bertong Bulldog eamang nga guin haeongan ratong kahita, abo kunta ro ana pang mabuligan. /MP
No comments:
Post a Comment