Sugilanon Ni Tita Linda

Ni Tita Linda Belayro

Hacienda Durano

Si Selmo hay tawong may edad eon. Pirmeng makita nga naga winarang sa karsada. Naga empa-empa eon ngani kon magtikang. May pagka buktot ag bulag ro sambilog nana nga mata. Owa mat-a imaw naga pakalimos. Naga balibad ngani kon taw-an it maskin anong pagkaon. Naga pamueot imaw it basura nga anang guina baligya sa junk shop. Ro kabak-eanan, imaw ro anang guina bakae it pagkaon. 

Idto naga estar si Selmo sa idaeom it tulay. Kaibahan nana ro mga eskwater nga owa it dogalingon nga baeay. Maatag si Selmo. Naga ta-o imaw it pagkaon sa ibang onga nga naga estar man sa idaeom it tulay.

Isaeang adlaw, may nag sungbil kana it pagkaon. Anang guin balibaran. Hakibot ro eaeaking nag sungbil kana it pagkaon. Busa guin sundan nana kon siin naga estar si Selmo. Pag abot ni Selmo sa baeay, abo nga naga hueat kana nga mga onga. Ro iba masakiton ag ro iba man hay may diperensyang pisikal. 

Nagsueod ro eaeaki. Hakita ro kwarto ni Selmo nga mahipid ro mga igdaeapat. May hakita man imaw nga retrato sa kwadro nga may tawong naga baton it diploma. May una man nga kwadro nga naga baton it kadungganan halin sa isaeang ka prehisteryoso nga organisasyon. Sangka kwadro man nga may lisensya it pagka piloto sa pangaean ni Anselmo Durano. 

Guin usisa ko eaeaki ro eskwelahan nga guin tapusan ni Selmo. Idto imaw nakasayod nga isaeang ka piloto gali si Selmo. Ro anang eroplano hay nabag-bag sa kabukiran it Sierra Madre, patay ro tanan nga pasahero ogaling ro piloto hay owa makita ra eawas. Nabuhi si Selmo ag guin sapupo it isaeang ka mangangahoy. Nagtenir imaw sa lugar ngaron ag nagpananum hasta nangin asawa nana ro onga it mangangahoy.

Ogaling sa pagbu-ot it Diyos, namatay sa pag unga ro anang asawa, pati pa man ro eapsag. Nagpanaw lang imaw sa siyudad nga owa it nakakilaea kana tongod sa anang hitsura nga abo nga mga pali it sunog. Sa siyudad, guin pabangdan imaw nga aswang o mangkukulam. May naduea nga unga ag guin sugid-sugid nga imaw ro nagkaon. Ko olihi nasayuran nga nag ea-as gali ro onga ag hakita it mga pulis sa lugar it mga eskwater. 

May guin hold-up man sa lugar ngaron ag si Selmo man guihapon ro guin pabangdan. Ko olihi, hadakpan it mga pulis ro minatu-od nga hold-upper busa guin paguwa sa presohan si Selmo. 

Abo ro habuligan ni Selmo nga mga eskwater. Nangin idolo imaw sa royon nga lugar. Abo nga napa bag-o nana nga mga adik sa alcohol ag mapait nga bueong. Ro mga estambay hay guina taw-an nana it pangabuhi-an. Abo nga guinikanan ro nagpasaeamat ay naglinong ro andang lugar ag nangin malimpyo. Nakaabot sa media ro tanan nga natabo. Guin interbyu si Selmo sa radyo ag telebisyon. 

Hakita imaw ko anang mga igbata sa telebisyon. Insigida nag adto sa siyudad ro anang pamilya ag imaw man ko tawo nga nagsapupo kana sa kabukiran. Nagkilita ro tanan sa estasyon it radyo. Ro anang eogta nga guin hawanan hay may nagbakae agod obrahon nga ranchohan. Ogaling owa nana igbaligya. Guin daea nana tanan idto ro mga eskwater agod idto mag estar. Makaron, ro lugar hay nangin Hacienda Durano sa Mindanao. /MP