Ro Ambisyosong Leon
Ni Tita Linda Belayro
Ro Leon ro guinakilaea nga hari it kagueangan. Naila guid imaw kon dayawon eabi guid ko mga babayeng Leon ag iba pang mga hayop. Nagdugang pa ro anang pagka bugaeon bangod guina pasundan – sundan eang imaw it mga hayop. Isaea eon rong bukaw nga guina kabig nga pinaka-maaeam sa tanan. Guina sugo nana ro Leon nga mag asawa eon agod may reyna man rong kagueangan. Naghandum imaw nga makapangasawa it eabaw sa asawa it iba pang mga hayop. Nagdisider imaw nga asawahon nana rong babaye nga nagaestar sa liwan it kagueangan. Kon mapahinuhod nana rong daeaga hay pagadayawon guid imaw it tanan nga hayop.
Ko isaeang agahon ngaron, nag adto imaw sa baeay it daeaga, may daea imaw nga mga bueak halin pa sa kagueangan. Guin baton imaw ogaling idto eamang imaw sa bintana guin gawa it daeaga ag ama. Maskin nagakurog sa kahadlok ro ama, matawhay nana nga guin hambae ro Leon.
“Haring Leon, bulahan ro akong unga nga mapangasawa kong hari it kagueangan, ogaling may pagka kilibuton ro akon nga unga ag nahadlok imaw sa mataeawis nga ngipon ag kamaeos. Ha-um imaw nga magpakasae kimo kon boe-on mo ro imong ngipon ag utdon rong imong kamaeos.”
Nagpasugot ro Leon. Insigida nag-adto sa dentista agod ipagabot tanan ro anang mga ngipon ag kamaeos. Nagbalik imaw sa baeay it daeaga ogaling ha-um eon rong wasay ko tatay. Insigida guin patay nana rong Leon. Owa nadayon rong ambisyon it Leon nga mapangasawa rong daeaga. /MP
No comments:
Post a Comment