Sugilanon Ni Tita Linda

Tita Linda Belayro

Sa Bukid It Olimpus

Ro bukid it Olimpus hay gina estaran it mga Dios ag Diosa sunô sa pagpati ko mga Griyego. Kapares it mga mortal, sanda ra hay may mga baeatyagon man ag naga entra sa pagpangabuhi it mga tawo. Kada isaea kanda hay may mga paboritong mortal. Ro iba kanda hay may mga onga sa mortal. Tongod kara, ro andang onga hay may mga kina-adman ag kina iya nga ha iridar sa ginikanan nga Dios o Diosa.
Isaea sa mga Diosa nga si Reyna Juno hay may paboritong mortal nga ro ngaean hay si Pheleas. Imaw ra hay pakî, indi maka tikang, halin pa sa pagkatawo, ogaling gwapo ag mabukod it pangeawason. Kada agahon, nagabisita kana si Reyna Juno nga may daeang kagamitan sa pagtikang, mga prutas ag gatas it baka. Ko olihi, tongod sa pagbulig ni Reyna Juno, nakatikang si Pheleas.
Umpisa nga nakatikang si Pheleas, pirme eon imaw nga naga pamasyar. Sa anang pag warang, may nakilaea imaw nga daeaga nga si Dinah. Sa owa magbuhay, nagkahagugma ro daywa. Pagkasayod ni Reyna Juno, naakig imaw it duro. Bu-ot nana nga pabueagon ro daywa. Guin butangan nana it mapintas nga dragon. Sa andang pag away, napierde ni Pheleas ro dragon.
Bangud ka ron, guin butang ro babaye sa mata-as nga bukid ogaling guin saka man guihapon ni Pheleas ag nabo-oe ro daeaga. Ko olihi, guinsakay ro daeaga sa baroto ag tongod sa pag huyop it mabaskog nga hangin, inapok sa isaeang ka isla ro daeaga. Guin eangoy ni Pheleas rong isla hasta nakaabot imaw. Idto eon lang sanda nagtener.
Owa eon it mahimo ro Reyna. Guin pundo nana ro pagbungkag ko andang paghigugma. Napamatud-an ni Pheleas nga ha-um nana nga itaya ro anang kabuhi sa ngaean it paghigugma. Duro ro kahikaw ni Reyna Juno kay Dinah. Ona eon kana ro tanan, manggad, poder ag hitsura ogaling kueang imaw it minatuod nga naga higugma bangod ro anang asawang si Haring Jupiter hay abô pa nga mga onga sa mga mortal.
"Ro tunay nga paghigugma hay indi matupungan it manggad." /MP