Saturday, September 29, 2007

Sugilanon Ni Tita Linda

Ni Tita Linda Belayro

Si Mara Ag Ro Prinsipeng Maeaw-ay


Unga pa tag mailo si Mara sa anang ina. Nag asawa it uman ro anang ama. Mapintas ag mahikaw ro anang madrasta. Mabuot ra imaw kon una pa ro anang ama, ogaling kon hieongbus ag mag-panaw sa trabaho ro anang ama, guina sinugo si Mara. Maskin naga dinugo eon ro anang siki ag alima hay sige pa guihapon imaw nga guina sinugo.
Ko olihi, ka’t indi eon matakuran ni Mara ro kapintas ko anang ina-inahan, nag ea-as imaw ag idto nag-adto sa ka-gueangan. Gutom nga gutom imaw ag gaoy nga mayad, ogaling sige pa gihapon ro anang pag-pinanaw. May hakita imaw nga maisot nga baeay. Anang guin adtonan ag sumueod. Sa kaga-oy nana, naka tueogan imaw sa maisot nga siya. Nag-abot ro mga tag-ana it baeay, mga duwende. Naeo-oy sanda sa dalagita, ngani guin pabay-an sa pagkatoeog eon lang nanda. Pag bugtaw ni Mara, hakibot imaw nga mga duwende gali ro anang kaatubang. Guin patener imaw it mga duwende. Imaw ro naga eaha it pagkaon, naga eaba ag naga sag-ob it tubi para kanda. Nalipay guid it duro ro mga duwende kay Mara. Kada hapon kon mag-uli sanda hay may daeang mga regalo.
Isaeang adlaw, sam-tang naga dilig imaw ko anang mga tanum, may umagi nga isaeang ka maeaw-ay nga eaeaki. Nangayo imaw it tubi kay Mara. Nagpakilaea imaw nga onga it mangangahoy ag naga bulig sa anang ama sa pagpangahoy agod ibaligya sa banwa. Umpisa kato, perme kana nga naga bisita ro binata ag may daea nga mga prutas o tinoean-on. Guin sampit imaw nga mamasyar sa may busay. Abo nga mga kadaeagahan ag kabi-nataan ro naga paligos sa busay. Guin hibaygan imaw kon ham-an it maeaw-ay ro anang kaibahan ay ka gwapa ro anang hitsura. Guin sampit imaw ko mga gwapuhon nga binata agod magpaligos ogaling nagpamalibad imaw.
Pag uli nanda sa baeay, may bisita nga gwapuhon nga prinsipe si Mara. Kaibahan imaw ko mga duwende ag bu-ot ipaasawa kay Mara. Naglibog ro oeo ni Mara kon sin-o ro anang pili-on. Ro maeaw-ay nga binata nga mabuot, o ro gwapuhon nga prinsipe nga makaron eamang nana hakilaea?
Parabil nag-uli ro maeaw-ay nga binata, guin taw-an si Mara it maisot nga espeho. Guin bilinan imaw nga gamiton ra sa tungang gabi-i kon bu-ot nanang tukibon ro naga libog sa anang oeo.
Pag-abot it alas dose, bu-ot nanang masayran ro anang paeaabuton. Nag-pakilaea ro anang hitsura nga isaeang ka prinsesa ag may korona. Dayon, bu-ot nanang masayuran kon sin-o ro gwapohon nga prinsipe. Tumambad sa espiho ro isaeang ka maeaw-ay nga halimaw nga naga pakuno-kuno nga prinsipe bangud sa anang mahika. Guin pangutana man nana kon sin-o rayang maeaw-ay nga binata. Hakibot imaw kat makita nana sa espiho ro gwa-pohon nga prinsipe nga anang kakilaea. Guin maldesyon imaw it isaeang ka bruha bangud anang guin sunlog.
Ro saeaming hay naga pakita sa matuod-tuod nga pagkatawo kon sin-o ro imong bu-ot masayoran, kon ro naga pangutana hay sincero sa anang katuyu-an. Bangud, putli ro pag-higugma ni Mara sa maeaw-ay nga binata, nagpakita sa saeaming ro kamatuoran. Pagbisita ko maeaw-ay nga binata kay Mara, owa it duha-duha nga mamunot imaw sa binata. Nagbaylo ro dagway it prinsipe. Habawi ro sumpa it bruha sa prinsipe. Guin kasae sanda ag nagmatuod ro hakita ni Mara sa espiho nga imaw hay isaeang ka prinsesa. /MP

No comments: