Thursday, June 09, 2011

Sugilanon Ni Tita Linda


Ni Tita Linda Belayro


Ro Onga Nga Malalison


May isaeang ka Ama nga may daywang ka onga nga eaeaki. Ro kamagueangan hay bu-ot mag alila it mga hayop ag magpananum. Samtang, ro kamanghuran mat-a hay bu-ot magpinamasyar ag magtambong sa mga kasadyahan.


Isaeang adlaw, guin tawag ko Ama ro anang daywang ka onga. Tongod magueang eon imaw, bu-ot nana nga masayuran ro andang mga plano sa pangabuhi. Naghambae ro kamanghuran nga bu-ot nana nga usuyon ro anang suwerte sa ibang lugar, busa bu-ot nana nga pangayu-on ro anang hueay nga manggad sa anang Ama.


Guin tao ko Ama ro anang guina pangayo, samtang nagpabilin ro kamagueangan. Pag abot sa siyudad, nagpaayaw-ayaw it kinalipay ro kamanghuran ag eain-eain nga mga babaye ro anang guina kabuhi. Umabot ro oras nga naubos eon ro manggad ko kamanghuran. Amat-amat nga nag paeagiw ro anang mga amigo hasta owa eon imaw it guinakaon. Agod may maka-on, nag presentar imaw sa isaeang ka mangunguma nga mag alila it baboy. Una man imaw maga estar maeapit sa tangkae. Guin baton imaw.


Ro guina daea nga damog sa baboy hay anang guina pili ro sarang pa makaon. Kon gabi-i sa anang pagtoeog, anang hadumduman ro anang guin halinan. Idto imaw sa eoyo ko anang Ama ag owa it gutom sa andang baeay.


Bu-ot nana nga magbalik ogaling, hadaog imaw it kahuya sa anang kaugalingon. Ko olihi, nagmasakit imaw ag owa eon imaw pagbatuna sa anang guina obrahan. Hapilitan imaw nga mag uli eonlang sa anda. Maeayo pa, hakita imaw ko anang ama. Sa kahuya nana, nangayo imaw it kapatawaran. Naghinyo imaw nga magpa sueogu-on eon lang agod mabaton it uman ko anang ama.


Guin sugo ko ama ro anang mga sueogo-on nga paligsan, bistehan, ag pakan-on ro anang nagbalik nga onga. Guin taw-an pa imaw it singsing tanda nga guina baton eon imaw ko anang Ama. Sa kalipay ko andang ama, nagpahiwat imaw it isaeang ka "welcome party" sa pagbalik ko hinigugmang onga.


Pagkahapon, nag abot ro kamagueangan halin pa sa eanas. Hangawa imaw nga matsa may piyesta sa andang baeay. Nasayuran nana sa mga sueogo-on nga nagbalik ro anang igmanghod ag guin abi-abi ko anang ama. Akig imaw nga nagpaeapit sa anang ama.


"Sa mabuhay eon nga paniyempo, iya ako nga guin pa umwad ko ro atong kahayupan ag kaeanasan ogaling maskin sambilog nga kanding hay owa guid nimo ako pag patyi. Makaron, nagbalik ro akong igmanghod nga naubos nana ro anang mana ogaling imo pang guin baton ag guin handaan" hambae ko magueang.


"Sa sueod it mahaba mga tiyempo, iya ka sa akong eoyo. Ro kutob akon hay imo tanan. Ro imong igmanghod hay nag eayo katon ogaling nagbalik nga naghinoe-soe. Imaw hay patay nga nabanhaw. Indi baea dapat nga magkalipay kita?" pahayag ko anang ama.


Bulahan ro nagkasaea nga nagbalik ag nag hinoe-soe. Kita tanan hay kaanggid ko ratong onga nga malalison. Nag paeayo kita sa atong ama sa eangit paagi sa pagpili sa tiko nga daean. Ogaling malipayon ro atong Ama kon kita magalik kana. Bukas ro anang alima sa pagbaton katon it uman. /MP

No comments: