Sugilanon Ni Tita Linda

Ni Tita Linda Belayro

Prinsesa Zoraya

May isaeang ka datu nga may tatlo ka unga nga pulos eaeaki. Sa kada unga, guin patugma nana sa Babaylan ro suwerte nanda. Suno sa tugma, puro abusador ro mga unga ag puro sakit it ueo ro dueot sa datu.

Ko olihi, naka unga imaw it babaye. Sa kinaandan, guin tugma ko babaylan nga imaw ro maga pamuno sa andang kaharian. Natawo imaw nga may haboe agod matago sa tanan ro prinsesa. Guin daea imaw sa isaeang ka isla agod idto imaw maga bahoe ag malikaw sa anang mga magueang nga pulos eaeaki nga maeain it pamatasan. Tongod sa kahidlaw sa anang onga, nagmasakit ro reyna hasta namatay.

Nag asawa it uman ro datu sa isaeang ka mapintas ag maluho nga babaye. Nag unga sanda it eaeaki ag buot nana nga imaw ro maga hari sa kaharian. Tongod kara, owa nana guina pa iba ro anang onga sa ibang onga it datu.

Sige ro pag ilinaway ko mga datu ag napierde si Datu Tarik. Guin buslan imaw it bag-o nga datu. Guin preso imaw sa idaeum ko anang palasyo. Nangin olipon ro anang asawa ag mga onga. May handum guihapon ro reyna, busa, naki alyansa imaw sa bag-ong datu. Nag panaw imaw sakay sa isaeang ka Vinta.

Idto imaw napad-pad sa isla ni Prinsesa Zoraya. Kilaea imaw ko prinsesa ogaling owa nana hakilaea ro Prinsesa. Nagpa olipon kana ro prinsesa agod makatipon it balita hanungod sa anang ama. Pagkasayod ko prinsesa nga guin preso ro anang ama, nagpanaw imaw eagi-eagi ko gabii ngaron sakay sa anang Vinta.

Pag abot nana sa palasyo, owa imaw makilaea tongod guin putoe nana ro anang buhok nga matsa eaeaking hangaway. Bato-bato nana nga naeopig ro mga guwardiya. Anad nga anad imaw sa pagbuyot it iba-ibang armas nga guin turo kana ko anang amigong magueang sa isla.

Nagsueod imaw sa presuhan ko anang ama. Nalipay ro anang ama sa pagkita nanda. Kat matawhay eon ro tanan, guin balik nana ro anang ama sa trono. Pagkasayod ko pangaywang asawa it datu, nag uli imaw ag nangayo it patawad sa prinsesa. Nag kasugot ro tanan nga magueang nga kon mamatay ro datu, si Prinsesa Zoraya ro maboeos sa trono. Nangin malinong ro pagdumaea it datu ag nag umwad ro andang lugar. Sa pagtaliwan it datu, nangin maeomo ro pagsalin sa korona kay Prinsesa Zoraya. Natuman eon man ro tugma (panghimaead) it Babaylan.

Paagi sa bato, may gahum si Pedrito kontra sa mga maeain nga espiritu. Abo ro anang habuligan eabi guid ro mga guina pigos. Nagtuon imaw it pagka maestro ag anang guin tun-an ro mga ulihing tubo it mga mayad nga pamatasan, paghanas ko andang mga abilidad ag kon ano ro pagserbisyo sa banwa. Nangin ma umwad ro lugar nanday Pedrito.

Isaeang ka huwaran nga komyunidad ag malinong nga naga kabuhi ro tanan. Hasta hapan-uhan ko mga punuan it siyudad, guina pangayaw ro andang lugar. Guin kaayad nanda ro eungib nga nangin daeayunan it mga turista tongod isaeang ka makasaysayan nga lugar.

Natuman ro tugma ko Babaylan. Si Pedrito ro reinkarnasyon ni Salim. Imaw ro naga hupot ko bato nga may gahum sa pagpabaylo ko pagdumaeahan ni Datu Doeogdog. /MP