Friday, June 17, 2011

Sugilanon Ni Tita Linda


Ni Tita Linda Belayro


Baganihan Sa Akong Kabuhi


Kada isaea katon hay may guina idolo. Sanda ro makabig naton nga baganihan sa atong kabuhi. Mahimo nga isaeang ka manugturo, amigo, artista o kon sin-o man nga makahimo it tumaeagsahon ag indi malipatan nga binohatan katon agud mag madinaeag-on sa pag pangabuhi.


Si Lina hay naga kabuhi kaibahan ko anang tatay. Umpisa nga guin aywan sanda ko anang ina nga nagmunot sa ibang eaeaki, si Tony ro nangin tatay ag nanay ni Lina. Kada abot ni Tony sa andang baeay halin sa pagpasada it tricycle, may guina uli imaw nga siopao o pansit o ano mang makuyam-kuyam kay Lina. Maskin naga tu-on si Lina, imaw ro naga digamo sa andang pamaeay. Kada pag abot ko anang ama hay haum eon ro tubi nga mainit, tsinelas, tuwalya ag anang ilislan. Abo ro naga sunlog kay Tony nga mag asawa it uman ogaling owa guid sa anang buot ro bagay ngaron.

Pagka tapos ni Lina sa pag eskwela sa high school bu-ot nana nga magpundo agod mag bulig sa anang ama. Ogaling owa mag sugot si Tony. Anang guin dugangan ro obra agod madugangan man do kita. Pagkatapos it pamasada, naga sueod pa si Tony sa beerhouse agod mag waiter. Guina tipon nana ro anang tip sa pag serbi para sa pagtu-on ni Lina.


Ko gabi-e ngaron, may nag rumble una sa bar. Indi guid abi malikawan ro away. May isaeang ka hilong ro nag ma-oy ag hakursunadahan nana ro Hapon nga naga inom man nga naga isaeanhon sa ibang lamesa. Husto guid nga naga paadto si Tony nga may daea nga tray ag hakita nana nga nag gabot it kurta ro hilong agod bun-on ro Hapon. Golpe nga hinaboy ni Tony ro tray sa hilong busa nabuhi-an ko hilong ro kurta.


Dali-dali man nga pinoeot ni Tony ro kurta agod usahon nga ebidensiya kontra sa hilong. Duro guid ro pasaeamat ko Hapon kay Tony. Guin dayaw si Tony sa radio, television ag sa mga baeasahon tongod sa mayad nga binuhatan. Pagkasayod ni Lina sa natabo, nalipay guid imaw ag bugaeon. Owa it eabot nga si Tony hay baganihan kay Lina, nangin baganihan pa imaw sa mata it ibang tawo. /MP

No comments: