Maila – on magbasa it komiks nga pantasya si Marly. Malipayon guid imaw pagkatapos it pagbasa. Guina paino ino abi nana nga imaw rong bida nga prinsesa, o bidang babaye tuead ni Darna, Wonder Woman, Volta o mga babayeng bida sa pantasyang komiks. Maskin indi imaw makabakae it pamahaw sa anang baeon basta may ibakae eamang it komiks.
Isaeang hapon it Sabado, samtang nagasandig imaw sa samad nga baroto sa may baybayon nga naga – atubang sa isaeang maeayo nga isla, nahakatoeogan imaw tongod sa maeamig nga huyop it hangin.
Naga amat-amat eon nga naga katunod rong adlaw ogaling ro kahayag sa Isla Del Mar, owa nagabalhin guihapon. Matsa isaeang ka gwapahon nga ada nga naga enganyo sa mga naga aging sakayang – dagat agod maghapit. Maangan-angan, matsa guinhakwat imaw ag idto imaw guindaea sa baybayon it isaeang ka isla. May nagsueang – sueang kana. Mga kababayenhan nga sari – saring kolor ro andang biste. May mabahoe nga payong ag isaeang guinpunihan nga pueongkuan ro nagahueat kana kun siin sumakay imaw paagi sa paghakwat it ap-at ka tawo kana. Ro mga tawo sa binit it daeanon hay naga hugyaw sa anang pag-agui ag ro andang guin abutan.
"Mayad-ayad nga pag-abot sa "Isla Delmar", singgit it mga tawo. May isaeang ka onga nga babaye rong nagpaeapit kay Marly nga may daeang butong it niyog, bilang pag-abi-abi. May iba man nga nag haead it kulentas nga bueak.
Nagtikang imaw pasueod it palasyo. Puro bueak ro anang guina tapakan. Naga kinang rong tanan nga mga kubyertos, siya ag lamesa. Pagkatapos nanda it kaon, guinpasyar imaw sa palibot it palasyo. Hakita nana nga bugana rong isla, malimpyo ag malipayon ro mga pomoeoyo ag mahugod tanan nga nagatrabaho ro kada isaea.
Sa owa magbuhay, maangan-angan hay may nagdungka nga isaeang ka barko. Nanaog ro mga tripulante nga daea ro andang mga kargamento. Sari-saring makinarya rong guin papanaog. Nagpaugdok it isaeang ka mabahoe nga pabrika sa isla.
Kada adlaw, iba-ibang tawo ro naga inabot. Hasta nag-abo eon rong nagastos sa Isla.
Tongod guinadayo rong isla, amat – amat nga guinatamaran rong mga tawo nga mag-adto sa eawod agud mangisda. Bukon eamang it maeagko nga baeay ro guinapatindog kundi mga baeay bakasyonan ag mga sari-saring baealigya-an it pagkaon.
Rong isla, suno sa mga dumaan nga mga tumandok hay naga tungtong eamang sa isaeang ka bato. Guina hambae man nga maabot rong tiempo nga kon magbug-at rong isla, maduea raya sa mapa. Owa magpati ro mga tawo. Sige sige ro andang pagbinaligya it eogta sa isla. Tanan eon rong mga eogta hay dumaeayo eon rong nagapanag-iya. Sanda ro nagamando kon pila rong presyo it mga baeakeonon ag pagpasueod sa Isla. Napilitan man nga mag pa-olipon ro dating may tag-ana it eogta bangod ubos eon it baligya ro andang mga eogta sa mga estranghero. Agud mabuhi, naga pasueogo-on lang sanda.
Umabot rong tiempo nga nagbug-at it abu rong Isla. May nagtuhaw nga mabaskog nga linog. Nagkagiltak ro mga bukid ag datag. Naglikya rong Isla paglinog ag tongod sa kabug-at, owa eon makabalik sa dating posisyon. Sumeod rong tubi sa mga kabaeayan. Sinue–ob pati ro mga maeagkong baeay-bakasyunan. Inanod ro mga maintok nga baeay paadto sa dagat. Sa pagdaeom it tubi, nabatyagan ni Marly nga imaw man hay inanod. Pagbugtaw nana, madaeom eon ro ta-ob sa anang guinasandigan nga samad nga baroto. Dali – dali imaw it tindog. Sa anang pagtan-aw sa dagat, una pa rong Isla, ro guinahandum nana nga Isla Del Mar nga bu ot adtonan. Nagakangay nga anang bisitahan agod tukibon rong misteryo nga nakaputos kara. /MP mailto:madyaas_pen@yahoo.com
No comments:
Post a Comment