Kon tiempo it tingo-ean, may mga bagyo, naga kilat ag nagadaeog-dog. Kon buean ngani it Hunyo hasta Disyembre, raya rong buean nga ma inoeanon ag mabagyuhon. Mabaskog ro uean, naga baha. Sige man nga pinangilat.
Isaeang ka tawo si Mente nga makilibuton sa kilat. Akig imaw kon magkilat. Sa anang pang idaron nga kinse anyos, guinaayat nana sa pakusog rayang kilat.
Isaeang kahapunanon, maea-in rong tiempo. Nagapungko imaw sa andang balkonahe. Golpeng kumilat it mataeom ag guinsundan it daeogdog. Nahueog si Mente sa bangko sa kakibot. Dali-dali imaw nga tumindog ag dumaeagan sa tunga it eati ag guin ayat nana it pakusog rong kilat. Guin sundan imaw ko anang lolo agod pauli-on. Nag hambae sanda ni Lolo nana.
Ro anang Lolo hay akig man sa kilat ogaling imaw hay mata-eaw.
"Para mapierde mo imaw, ro kilat, imo nga tuslukon ro anang pusod," hambae ag sugo ko anang lolo.
Nahadluk si Lolo nana, ngani kada magpangilat, naga panago imaw. Naghambae si Mente nga owa imaw nahadluk. Haum imaw nga atubangon rong kilat. Ogaling siin rong pusod it kilat?
Ko isaeang gabi-i ngaron, nagdamgo si Mente nga sa ikapitong bukid naga estar rong kilat. Anang guin adtonan ro pusod it kilat. Sa anang pagpanaw, nakasubeang imaw it magueang, hermitanio. Nag sugid si Mente kun siin imaw ga adto ag kon ano ro anang katuyo an. Guin taw-an imaw ko magueang it isaeang ka baston. "Raya ro isagang mo sa kilat. Pagkilat it pangatlo, ituslok mo ra sa puno it kilat. Dayon naduea rong magueang ag golpe imaw nga habugtaw.
Hakita nana ro isaeang ka kurting baston sa anang kilid. Guinsugid nana sa anang Lolo ro anang damgo.
Pagka agahon ngaron, guinpabaeonan imaw it pagkaon ag ilimnon ko anang lolo. Nag panaw imaw. Guin umpisahan nana rong pagsaka sa ika-pitong bukid. Hapon eon ka’t maabot nana rong baeay it kilat. Golpe nga nag dueom rong kaeangitan. Naghuyop rong hangin. Guinpalis ro hangin ko anang baston. Sumunod rong primerong kilat. Guinpalis man nana ag pag – abot sa pangatlo, guin tuslok nana rong kilat. Golpe nga nageoya rong kilat ag nabatian rong daeogdog. Naga kurog rong daeogdog. Matsa naga ogayong nga nasakitan.
Halin kato, kon magdaeogdog pagkatapos it kilat, mabatian rong pagkurog sa kahadluk kong daeogdog. Nalipay si Mente nga natuman ro anang handum nga maatubang ag mapierde nana rong kilat. /MP mailto:madyaas_pen@yahoo.com
No comments:
Post a Comment