Sugilanon Ni Tita Linda

Ni Tita Linda Belayro

Luki Ag Ritzi

May isaeang ka manog pangahoy nga nabaeo kato pa eamang. Haaywan kana ro daywang ka mga onga nga si Luki ag Ritzi. Bata pa ro daywa busa ha-isipan ko manog pangahoy nga mag-asawa it uman agod may kaibahan imaw nga maga atipan ko anang mga onga.
May isaeang ka daeaga nga naila-an ko manog pangahoy. Nagkasugot sandang daywang magpakasae. Ogaling pagtaliwan it kasae, mapintas gali sa daywang ka onga ro bag-ong tapik nga ina. Kon owa ngani rong manogpangahoy, guina pintasan nana ag owa guina pakan-a ro daywang ka onga. Ko olihi, owa makatakod ro daywa, busa nag ea-as sanda ko isaeang gabi-i ngaron. Idto sanda umadto sa kagueangan. May hakita sanda nga iwag. Guin eapitan ko daywa ag hakita nga isaea gali ka baeay nga putos it tsokolate, tinapay ag mga dulce. Sa kagutom ko daywa, sige sanda nga habnit it pagkaon. Ka’t busog eon sanda, sumueod sanda sa baeay agod magkatoeog sa mahumok nga katre.
Pag-abot it tungang gabi-I, umabot ro tag-baeay nga bruha ag guin halin sanda sa isaeang ka kulungan. Pagbugtaw ko daywa ko pagkaaga, hakulong sanda sa isaeang ka sae-saeon nga kulungan.
Raya gali nga bruha hay naga kaon it mga onga. Guina putos nana it mga tsokolate, cookies ag dulce ro anang baeay agod abong mga onga ro maganyak mag-adto.
Ko hapon ngaron, nagpakita ro bruha kanda. Bu-ot nana nga magtambok pa ro daywang ka onga, ngani guina tinaw-an nana sanda it pagkaon. Ka’t bu-ot eon nga kan-on ro daywa, guin paeapitan nana ro kulungan agod tan-awon kon matambok eon ro daywa. Guin dawat nana ro anang alima sa daywa. Maabtik nga nagbo-oe it toe-an it manok si Luki ag tina-o nana sa bruha. Tongod madueom ro anang mata, nagsinghan imaw nga kueang pa sa katambok sanda ngani kinahangean nga pakan-on pa. Imaw nga imaw ro andang guina obra kada mag-abot rong bruha.
Ko olihi, owa eon it matambok nga onga nga makaon ro bruha, ngani guin paguwa nana ro daywa. Guin pasag-ob si Luki samtang si Ritzi ro naghaling it kaeayo sa dapog agod initon ro tubi sa kawa.
Maangan-angan, nagsinggit rong bruha.
"Abe Ritzi, tan-awa baea kon mainit eon ro pugon!" Ro maaeam nga si Ritzi nag sabat, "Paalin ro pagsueod sa pugon? Indi ako kaantiguhan." "Para magtan-aw eang it pugon, indi ka kaantiguhan?" sabat it bruha. Sumueod ro bruha sa puertahan ag guin pakita kon paalin magsueod.Ka’t nakasueod ro bruha ag magling-ling sa pugon, golpe imaw nga tinoeod ni Ritzi sa kaeayo ag sinarhan ro puertahan. Nasunog ag namatay ro bruha. Dali-dali nanda nga guin buhi-an ro iba pa nga maniwang nga preso ag mga hayop. Dayon umuli sanda sa andang dating baeay.
Guin daea pa nanda ro mga alahas it bruha. Pag-abot sa anda nga baeay, nalipay ro andang ama sa andang pagbalik. Guin sugid man nanda kon paalin sanda guin trato ko andang madrasta. Guin bueagan ko andang ama ro andang mapintas nga madrasta ag nagkabuhi sanda nga bugana ag malipayon. /MP